Prozedura berri honek indarkeria matxistari aurre egiteko erantzun azkar, koherente eta errespetuzkoa bermatzea du helburu
DURANGO | Udalak indarkeria matxista desagerrarazteko eta berdintasuna sustatzeko konpromisoa berretsi du. Helburu horrekin, indarkeria matxista kasuetan erantzun publikoa emateko prozedura instituzionala prestatu du, larritasun bereziko egoeretan erantzun azkar eta koherentea bermatzeko.
Durangok aktiboki lan egin du berdintasun eta indarkeria matxistaren aurkako politiketan, baina orain arte ez zegoen erantzun publiko instituzionalerako protokolo espezifikorik. Prozedura berri hau Emakumeen eta Gizonen Berdintasunerako III. Planaren (2022-2027) baitan dago, eta indarkeriarik gabeko bizitzak eta tokiko eragileen inplikazio aktiboa sustatzen ditu.
Prozeduraren helburu nagusia da Udala publikoki indarkeria matxistaren aurka jartzea, herritarrak sentsibilizatzea, biktimak babestea eta komunitatearen gaitzespen irmoa erakustea.
Durangoko Udalaren prozedura argitasun, irmotasun eta errespetu printzipioetan oinarritzen da. Jarduera instituzionala tolerantzia-ezaren mezu irmoak gidatuko du, biktimaren duintasuna eta pribatutasuna bermatuz. Informazioa fidagarria eta egiaztatua izango da, eta arreta azkarra eta eraginkorra lehenetsiko da. Era berean, prebentzioa eta erantzun koordinatua sustatuko dira.
Prozedura larritasun edo garrantzi bereziko kasuetan aktibatuko da: bikotekidearen hilketa edo hilketa-saiakera, feminizidioa, sexu eraso larriak, eraso kolektiboak, edo erasotzailea pertsona garrantzitsua denean. Halaber, udalerrian garrantzi sozial handiko kasuetan ere aktibatuko da.
Prozedura aktibatzean, Udalak biktimei laguntza emango die eta mobilizazio sozialekin bat egingo du. Mugimendu feministak protestaren bat antolatzen badu, Udalak babesa emango dio, borroka kolektiboa indartuz.
Fase nagusiak
- Koordinazio mahaia deitzea lehen 24 orduetan.
- Informazioa bildu eta egiaztatzea, biktimaren pribatutasuna zainduz.
- Erantzun publikoa aktibatu ala ez ebaluatzea.
- Eragile sozialekin koordinazioa eta adierazpen instituzionala zabaltzea.
- Biktimarekin harreman zuzena bermatzea, erantzun koherentea emateko ezinbestekoa.
Prozedura honek Udalak modu argi, azkar eta errespetuzkoan erantzutea bermatzen du, biktimak babestuz, herritarrak sentsibilizatuz eta genero indarkeria baztertuz.
Jesica Ruiz Berdintasun zinegotziak nabarmendu duenez, “Durangoko Udalak indarkeria matxistaren aurkako borrokan eta berdintasunaren sustapenean duen konpromisoa indartzen du prozedura honek”, eta “jarduera azkarra eta koherentea bermatuko du, biktimei laguntza eskainiz”.
