Ekimenak Euskadiko 56 udalerriren parte-hartzea izan du, eta guztira 118 milioi urrats baino gehiago batzea ahalbidetu du
DURANGO | Udalak oso positibotzat jo du udalerriak Mugiment Pausu Erronkaren II. edizioan izandako parte-hartze arrakastatsua. Ekimen hau Mugiment Ekintza Planaren baitan dago, eta bere helburu nagusia gizarte aktiboago bat sustatzea da, jarduera fisikoa bultzatuz eta sedentarismoa murriztuz, bereziki pertsona ez-aktiboei zuzenduta. Plan honek herritarren egunerokoan bizi-ohitura osasungarriak txertatu nahi ditu ekintza sinpleen bidez, hala nola gehiago ibiliz eta eguneroko mugimendua areagotuz.
Aurtengo edizioan, Jarduera Fisikoaren Orientazio Zerbitzua duten Euskadiko 56 udalerrik hartu dute parte. Hiru astez, ehunka pertsonak egunero urratsak egin dituzte bizimodu aktiboago baten alde, eta guztira 118.498.363 urrats erregistratu dira parte hartu duten udalerri guztien artean.
Durango bereziki nabarmendu da edizio honetan, Euskadiko parte-hartze handiena izan duen udalerria bihurtu baita, guztira 74 pertsonak eman baitute izena hiru asteko erronkan. Herritarren inplikazio eta ahalegin bikain hau aitortzeko, Udalak bost opari-txartel zozkatu ditu tokiko parte-hartzaileen artean, eta sarituak Oier Urigoitia, Javi Coto, Almudena Olopez, Bittor Etxeguren eta Ibon Isuskitza izan dira.
Era berean, Durangok aitorpen gehigarri eta oso garrantzitsua lortu du erronkaren beste kategoria batean. Izan ere, aitortutako desgaitasuna duten emakumeen kategorian urrats gehien egin dituen parte-hartzailea udalerriko bizilaguna da. Hori dela eta, Durangoko Udalak Catalina Materio zoriondu nahi izan du lortutako emaitza bikainagatik eta erakutsitako inplikazioagatik.
Ekimen honen bidez, Durangoko Udalak jarduera fisikoa sustatzeko eta herritarren osasuna zein ongizatea hobetzeko konpromisoa berretsi du, bizi-ohitura aktiboagoak eta osasungarriagoak bultzatzen dituzten proiektuen alde egiten jarraituz.
