Erakundeak Mungiako Merkataritza Elkartearen eta Zabalondoko Industrialdeko Elkartearen lana ere aitortu du
TXORIERRI | Mungialdeko Behargintzak 25. urteurrena ospatu zuen azaroaren 5ean, Mugire Txokoan egindako ekitaldi berezi batean. Topaketak 80 bat lagun bildu zituen, tartean eskualdeko erakunde, enpresa, ikastetxe eta eragile sozioekonomikoetako ordezkariak.
Ospakizuna 13:00etan hasi zen, urteurrenerako prestatutako bideo baten proiekzioarekin. Ikus-entzunezkoak erakundearen ibilbidea errepasatu zuen, 2001ean sortu zenetik ordura arte izandako bilakaera eta enpleguaren, prestakuntzaren, ekintzailetzaren eta enpresa-garapenaren arloetan egindako lana jasoz.
Ondoren, Alaitz Erkoreka Mungiako alkateak ongietorria egin zien bertaratutakoei. Bere hitzaldian, Behargintzak eskualdeko garapen ekonomikoan zuen garrantzia nabarmendu zuen, baita urte hauetan erakundearen ibilbidea posible egin zuten profesionalen, erakundeen eta eragile sozioekonomikoen arteko lankidetza ere.
Ekitaldiko une esanguratsuenetako bat bi elkarteri egindako aitortza izan zen. Batetik, Mungiako Merkataritza Elkartearen lana nabarmendu zuten, hurbileko merkataritza sustatzeko, tokiko negozioei laguntzeko eta udalerriko jarduera ekonomikoa dinamizatzeko egindako ekarpenagatik.
Bestetik, Zabalondoko Industrialdeko Elkarteari ere aitortza egin zioten, industria-sarea indartzeko, enpresen arteko lankidetza bultzatzeko eta eskualdeko garapen ekonomikoari laguntzeko egindako lanagatik.
Bi aitortza horien bidez, Mungialdeko Behargintzak merkataritzak eta industriak eskualdeko ekonomian zuten garrantzia azpimarratu nahi izan zuen, baita sektore horietako eragileekin elkarlanean jarraitzeko konpromisoa ere.
