Gainera beheko solairuetako lokalak etxebizitza bihurtzeko ordenantza landuko du 

IURRETA – Iurretako Udalak etxebizitzarekin duen konpromisoa berretsi du gai honen inguruan egindako ezohiko osoko bilkura monografikoan. Tokiko gobernu-taldeak elkarrizketarako eta adostasunerako borondatea agertu du oposizioko taldeek (EH Bildu eta PSE-EE) aurkeztutako hainbat proposamen onartuz eta gidatuz, baina jarrera irmoari eutsi dio udal-diru-kutxen eta hirigintza-orekaren defentsan.

Udalak gogoratu nahi izan du etxebizitza arloko eskumen esklusiboa eta eskubide subjektiboa Eusko Jaurlaritzari eta Alokabideri dagozkiela legez. Hala ere, laguntzaile aktibo gisa duen eginkizuna bere gain hartuta, herrian eragin zuzena izango duten neurriak bultzatuko ditu. Horien artean nagusia, beheko solairuetan kokatutako lokalak etxebizitzetan bihurtzeko ordenantza berri bat idaztea da, laster hirigintza batzordean hasierako onespenerako aurkeztuko dena.

Era berean, tokiko merkatuaren erradiografia zehatza eta erreala lortzeko asmoz, Udalak formalki eskatuko dio Eusko Jaurlaritzaren Etxebizitzaren Behatokiari azterlan bat egiteko, Iurretako etxebizitzaren egungo egoera ezagutzeko eta udalerriak “Eremu Tentsionatu” izendatzeko baldintzak betetzen dituen aztertzeko.

Irmotasuna

Hirigintzari dagokionez, gobernu-taldeak ez du onartu Bide Ondo lurzatiaren besterentzea (salmenta) geldiarazteko oposizioaren proposamena. Eremu horretan 45 etxebizitza eraikitzea aurreikusten da, eta horietatik 12 tasatuak izango dira, herritarren beharrei zuzenean erantzuteko.

Gobernu-taldeak adierazi du partzela hori doan Jaurlaritzari lagatzeak “justifikaziorik gabeko ondare-kaltea” ekarriko liokeela herriari. “Eragiketa horretatik eratorritako hirigintza-diru-sarrerak ezinbestekoak dira udalerri osoko auzo eta kaleetan beharrezkoak diren zerbitzuak hobetzeko eta proiektu garrantzitsuak finantzatzeko”, defendatu dute, Hiri Antolamenduko Plan Orokorrean (HAPO) onartutako ibilbide-orriari erantzukizunez eutsiz.

Jarrera proaktiboa erakutsiz, gobernu-taldeak oposizioko alderdiek planteatutako ekimen ugarirekin bat egin du:

• Hutsik dauden etxebizitzak eta Bizigune: Hutsik dauden etxebizitzen barne-errolda edo padroi bat sortzeko lan egingo du Udalak. Gainera, jenderik gabeko etxebizitzetarako OHZren (IBI) errekargua % 75era igotzea bideragarria den aztertuko da eta Alokabideri herrian Bizigune programaren kanpaina indartzeko eskatuko zaio (Udalak zerga horren % 50eko hobaria ematen dio jabe bakoitzari).

• Lokal sozialak Elixalden: Kontuan hartu da Elixaldeko hiru lokal etxebizitza sozial bihurtzeko proposamena. Gobernu-taldeak jakinarazi duenez, neurria oso bideratuta dago jada, Eusko Jaurlaritzako Etxebizitza Sailarekin hainbat hilabetetan izandako “elkarrizketa diskretuen eta koordinatutako lanaren” ondoren.

• Gazteen emantzipaziorako laguntzak: Urte amaierarako oinarriak berriro aztertuko dituela iragarri du Udalak, laguntzak gazte iurretarren egungo beharretara egokitzeko eta dirulaguntzak modu zuzenagoan iristen direla ziurtatzeko.

• Gelen alokairua eta gizarte-larrialdiak: Iurretan dagoen arazoaz jabetuta, proposamena Durangaldeko Mankomunitateari helaraziko dio Udalak, erakunde mankomunatuak baitu gizarte-zerbitzuen eskumena arlo honetan.

Akordio horiekin, Iurretako Udalak erakutsi nahi du posible dela “anbizio handiko etxebizitza-politika sozial eta hurbila udalerriaren interes kolektiboak babestuko dituen kudeaketa ekonomiko arduratsu batekin uztartzea”.