Ertzaintzak eta Polizia Nazionalak hiru pertsona atxilotu dituzte Alacanten
DURANGALDEA / BIZKAIA | Ertzaintzak eta Polizia Nazionalak elkarrekin egindako operazio bati esker, etxeetan indarrez lapurtzen espezializatutako erakunde kriminal ibiltari bat desegitea lortu dute. Orain arte, agenteek hogei lapurreta argitzea lortu dute; horietatik bost Bizkaian egin zituzten —zehazki, Durangon, Amorebieta-Etxanon eta Galdakaon— eta gainerako hamabiak Alacanteko probintzian.
Euskadiko ikerketa joan den otsailean hasi zen, Ertzaintzak egun gutxitan hiru udalerri horietako etxeetan lapurreta ugari egin zirela detektatu ondoren. Bizkaiko Lurralde Ikerketa Kriminalerako Zerbitzuko (SICTB) agenteek egiaztatu zutenez, eraso guztiek patroi bera eta teknika oso zehatz bat jarraitzen zuten: “itsasgarriaren hariaren” metodoa (edo kola-haria).
Taldeak modu oso antolatuan lan egiten zuen, hierarkia zorrotz batekin eta hainbat fasetan banatutako modus operandi isil batekin:
-
Markaketa: Lapurreta egin baino egun batzuk lehenago, lapurrek itsasgarri-hari fin eta ikusezin bat jartzen zuten hautatutako etxeetako atearen eta markoaren artean.
-
Egiaztapena: Bat edo bi egun pasatuta, berriro itzultzen ziren. Haria apurtu gabe bazegoen, etxekoak sartu ez zirela esan nahi zuen eta, beraz, etxea hutsik zegoela ziurtatzen zuten.
-
Erasoa (‘Impresioning’): Etxeetara sartzeko, aluminiozko xafla finak zituzten giltza maisuak erabiltzen zituzten. Teknika horren bidez, sarraila moldatzea eta atea irekitzea lortzen zuten, inolako indarkeria-arrastorik edo kalterik utzi gabe. Alde egitean, atea maratilaz ixten zuten; ondorioz, biktimak ez ziren lapurretaz jabetzen oporretatik itzuli arte.Polizia-ikerketek zehaztu zutenez, taldeak Estatu osoan egiten zuen lan, baina bere “operazio-basea” Torreviejan (Alacante) zuen etxe baten finkatuta zeukan. Poliziaren lana zailtzeko, maiz aldatzen zituzten alokairuko autoak erabiltzen zituzten, eta taldekideen artean “txandakatzeak” egiten zituzten: Espainian zeuden kideak Europako beste herrialde batzuetatik etorritakoengatik aldatzen zituzten aldian-aldian.
Azkenik, Polizia Nazionalarekin koordinatu ondoren, agenteek Torreviejako etxea miatu zuten. Bertan, bitxi asko, luxuzko erlojuak, eskudirua eta sarrailagintzarako tresna eta giltza maisu ugari konfiskatu zituzten. Operazioaren ondorioz, 33, 34 eta 38 urteko hiru gizon atxilotu dituzte, eta jada epailearen esku utzi dituzte, indarrez lapurtzea eta talde kriminaleko kide izatea egotzita.
Mota honetako bandek jabeak etxean ez dauden garaiak aprobetxatzen dituztela eta, Ertzaintzak herritarrei gogorarazi die ateak ondo zaintzearen garrantzia, eta auzokideen markoetan ezohiko markaren bat, plastiko txikiren bat edo itsasgarri-hariren bat ikusiz gero, berehala 112 zenbakira deitzeko aholkatu du.
