Iraupen luzeko langabeei edo Diru-sarrerak Bermatzeko Errentaren onuradunei zuzendutakoa
DURANGO | Durangaldeko Mankomunitateak, Durangaldeko Behargintza – Eskualdeko Garapen Agentziaren bitartez, enplegua sustatzeko eta egoera ahulean dauden kolektiboei laguntzeko proiektua jarriko du martxan abenduaren amaieran. Diru-sarrerak Bermatzeko Errenta (DSBE) jasotzen duten 10 langaberen kontratazioa ahalbidetuko du programak, baita proiektuaren koordinazioaz arduratuko den pertsona baten kontratazioa ere. Kontratatuko diren pertsonak Abadiñon, Atxondon, Berrizen, Durangon, Elorrion, Garain, Iurretan, Izurtzan, Mañarian edo Zaldibarren erroldatuta egon beharko dute.
Proiektuak, Adinekoei Laguntzen izenekoak, 171.150 euroko dirulaguntza du, Lanbide Euskal Enplegu Zerbitzuak emana. Proiektua bi arazo nagusiri aurre egiteko diseinatu da. Lehenik eta behin, lehentasunezko behar sozial bati erantzuteko: nahi ez den bakardade maila bati aurre egiteko laguntza behar duten pertsonei, bereziki adinekoei, laguntza emateko. Helburua da, ahal den neurrian, zahartze aktiboa sustatzea, haren ongizatea eta bizi-kalitatea hobetzeko. Bigarrenik, egoera ahulean dauden kolektiboen enplegagarritasuna bultzatzeko, Diru-sarrerak Bermatzeko Errenta (DSBE) jasotzen duten iraupen luzeko langabeen ikuspegi berezi batekin. Enpleguko eta prestakuntzako programa honen bidez, mendetasunari laguntzeko sektorean lan-esperientzia indartzeko aukera ematen zaie.
Bestalde, kalteberatasun egoeran dauden kolektiboen enplegagarritasuna indartzea du helburu proiektuak, eta, bereziki, Diru Sarrerak Bermatzeko Errentaren (DSBE) onuradun diren iraupen luzeko langabeengan jarri du arreta. Enplegu- eta prestakuntza-programa honetan parte hartuta, pertsona horiek aukera izango dute mendetasunari laguntzeko sektorean lan-esperientzia indartzeko. Eremu hori funtsezkoa da gizarteari egiten dion ekarpenagatik, eta, gaur egun, hedatzen ari da, eta zailtasunak ditu gero eta handiagoa den profesional kualifikatuen eskaerari erantzuteko. Hala, Durangaldeko Mankomunitatearen proiektu hau kalteberatasun egoeran edo bazterketa arriskuan dauden pertsonei zuzenduta dago, batez ere DSBE jasotzen duten langabezia egoeran dauden emakumeei.
Helburua da emakume horiek gaitzea, desirarik gabeko bakardade-egoeran dauden pertsonei laguntza eta akonpainamenduko lan profesionala egin dezaten, eta horrek, gainera, lagun diezaieke beren autokonfiantza eta garapena indartzen.
Programa honetan parte hartu ahal izateko ezinbestekoa da Lanbide-Euskal Enplegu Zerbitzuan lan-eskatzaile gisa izena emanda egotea. Eskaerak Lanbideren webgunearen bitartez bideratu beharko dira: Etxez etxeko zaintza pertsonaleko langileak (Kodea:162024014380) eta Enplegu planeko koordinatzailea (Kodea: 162024014365).
