Igandeko goizaldean, gainera, neguko ordutegian sartuko gara: 03:00etan erlojua 02:00etara atzeratu beharko da
EGURALDIA | Asteburuak bi fase meteorologiko nabarmen izango ditu. Ostiralean eguraldi nahasiagoa eta desatseginagoa izango da, bereziki kostaldean; larunbatean eta igandean, berriz, eguraldiak hobera egingo du pixkanaka, eta eguzkia gehiago agertuko da, batez ere hegoaldean eta barnealdean.
Ostirala hego-haizearekin eta tenperatura epel samarrekin hasiko da. Hala ere, goizaldean fronte bat iritsiko da, eta haizeak mendebaldera egingo du. Kostaldean indartsu joko du, eta eguraldi desatsegina utziko du egunaren zati handi batean.
Goizaldean euri pixka bat egin dezakeen arren, egunean zehar hodeiak eta ostarteak tartekatuko dira. Kostaldean pilatuko dira hodei gehien, eta han zaparrada batzuk bota ditzake, batez ere arratsalde erditik aurrera eta ipar-ekialdean. Barnealdean, aldiz, eguraldia lehor mantenduko da gehienbat. Tenperatura maximoak pixka bat jaitsiko dira, eta eguneko minimoak iluntzean neurtuko dira.
Larunbata: hobera egingo du
Larunbata hodei ugarirekin hasiko da iparraldean. Kostaldean, bereziki Gipuzkoako ipar-ekialdean eta Lapurdin, goizaldean edo goizeko lehen orduetan zaparradaren bat bota dezake.
Hala ere, egunak aurrera egin ahala, egoera aldatuko da: euria eten egingo da, mendebaldeko haizeak indarra galduko du eta ostarteak gero eta zabalagoak izango dira. Hegoaldean, eguzkia eta zeru garbiagoak goizetik nagusituko dira. Eguzki-ordu gehiago izango direnez, tenperatura maximoak pixka bat igo daitezke.
Igandea: ordubete gehiago
Igandean larunbateko joerari eutsiko zaio, eta eguraldiak hobera egingo du lurralde osoan. Hodeiak eta ostarteak tartekatuko dira, baina giro lehorra nagusituko da oro har. Tenperaturak atseginak izango dira, eta aire zabaleko planak egiteko aukera egongo da bai kostaldean, bai barnealdean.
Eguraldiaz gain, kontuan hartu beharreko beste hitzordu bat ere badago: larunbatetik iganderako goizaldean neguko ordutegian sartuko gara. Hala, igande goizaldeko 03:00etan erlojua ordubete atzeratu eta 02:00ak izango dira. Beraz, ordubete gehiago izango dugu lo egiteko, igande eguzkitsu eta atseginari ekin aurretik.
