Andoni Beristainek sortu du aurtengo iruditeria, euskal kulturaren aniztasuna eta sortzaileen lana ardatz hartuta
DURANGO | Durangoko Azokaren 61. edizioko iruditeria aurkeztu dute gaur Landako Gunean. Andoni Beristain diseinatzaile, argazkilari eta arte zuzendariak sortu du aurtengo proposamen bisuala, euskal kulturaren aniztasuna eta sorkuntzaren atzean dagoen lana nabarmentzeko helburuarekin.
Abenduaren 4tik 8ra egingo da azoka, eta, beste urte batez, euskarazko eta Euskal Herriko kulturaren topagune nagusietako bat izango da. Liburuak, diskoak, irudiak, hitzak, doinuak eta ideiak partekatzeaz gain, kulturaz gozatzeko eta sortzaileekin harremanetan jartzeko aukera eskainiko du.
Aurkezpenean Gerediaga elkarteko eta azokako guneetako arduradunak izan dira, baita erakunde babesle eta kolaboratzaileetako ordezkariak ere: Durangoko Udala, Bizkaiko, Arabako eta Gipuzkoako foru aldundiak, Eusko Jaurlaritza, Nafarroako Gobernua, BBK, Eroski, Euskaltel, Konfekoop eta EITB.
Iaz, 60. edizioaren harira, Durangoko Azokak bere izaera laburbiltzen duen izendapena hartu zuen: «DA! Kulturaren Jaialdia». Beñat Gaztelurrutia azokako koordinatzaileak azaldu duenez, aurten ere ideia horri eutsiko diote, hainbat kultur adierazpide eta diziplina bildu, sortzaileak eta hartzaileak elkartu eta euskal kultura sustatzeko duen eginkizuna indartzeko.
Sortzaileen lana, erdigunean
Aurtengo iruditeriaren bidez, Durangoko Azokak sorkuntzaren balioa eta sortzaileen lana ikusarazi nahi ditu. Gaztelurrutiaren hitzetan, kulturaren aberastasuna ez dago soilik eskaintzen diren diziplina eta proposamenen aniztasunean; horien atzean dagoen lanean ere badago.
«Sortzea ez da berezko bulkada hutsa: irudimena behar da, baina baita formazioa, lana, arreta eta iraunkortasuna ere», azaldu du koordinatzaileak. Horregatik, azokak sortzaileen ekarpena aitortu eta ikusgarri egin nahi du.
Gaztelurrutiak, gainera, euskal kulturara hurbiltzen ari diren kulturzale berrien interesa nabarmendu du. Azkenaldian euskarazko hainbat sortzaileren ekoizpenek arrakasta izan dutela eta horrek publiko berriaren jakin-mina piztu duela adierazi du. Azokaren asmoa da interes horri jarraipena ematea eta euskal kulturaren aniztasuna ezagutzeko ateak zabalik izatea.
Andoni Beristainen proposamen bisuala
Aurtengo iruditeria bi ideiatatik abiatu da: euskal kulturaren aberastasunetik eta sorkuntza analogikoaren balioa aldarrikatzetik. Horretarako, kulturaren arlo desberdinetan erabiltzen diren objektuak jarri ditu Beristainek irudien erdigunean, bodegoien bidez diziplina eta sortzaile guztiei lekua egiteko.
Irratiko mikrofonoa, margolarien paleta, kamera analogikoa, idazmakina, walkmana eta kasetea dira, besteak beste, irudietan agertzen diren objektuetako batzuk. Horien bidez, kulturaren hainbat esparruren bilakaera eta sorkuntzan erabilitako tresnen garrantzia erakutsi nahi izan ditu artistak.
Beristainek azaldu duenez, teknologia berriak iritsi zirenean tresna horietako asko desagertuko zirela uste izan zen, baina gaur egun ere bizirik diraute, eta batzuek indarrez berreskuratu dute beren lekua.
Koloreek eta testurek ere badute garrantzia proposamenean. Artistak giro goxo eta gertukoa sortu nahi izan du, etxeko moketaren antzeko atzealdea erabiliz. Horrela, objektuak eta horien bidez transmititu nahi dituen mezuak modu hurbilean aurkeztu ditu.
Zumarragatik Donostiara, sormenaren bidean
Andoni Beristain Zumarragan jaio zen eta 18 urterekin Bartzelonara joan zen diseinu grafikoa ikastera. Ikasketetan argazkigintza deskubritu zuen, eta, ondoren, arte zuzendari gisa lan egin zuen bi enpresatan. Sei urtez unibertsitatean ere eman zituen eskolak.
Duela bost urte Donostiara joan zen bizitzera, eta gaur egun bere estudioan egiten du lan, argazkigintzan, diseinuan eta arte zuzendaritzan. Bere estiloa koloretsua eta minimalista da, ukitu surrealistarekin, eta irudi xumeen bidez gogoeta eragitea du helburu.
Bere proiektu pertsonalen artean daude Pieza Redonda, gorputz ez-normatiboei buruzkoa; Pieza Rota, minbiziaren inguruko estigmari buruzkoa; eta Pieza Madre, amari agur egiteko sortutako argazki-liburua.
Euskal Herria, euskara eta hemen bizitako esperientziak ditu bere sormenaren sustrai. Horregatik, Durangoko Azokaren 61. edizioko iruditeria sortzea berezia izan da Beristainentzat, aspalditik zuen ametsa bete baitu: maite duen herrialdeko kultur proiektu bati bere begirada artistikoa eskaintzea.
Azokaren aurtengo iruditeriak, beraz, euskal kulturaren aniztasuna erakusteaz gain, sorkuntzaren atzean dagoen lana eta erabiltzen diren tresnen balioa ere aldarrikatzen ditu. Abenduan, Landako Guneak kultur adierazpide horiek guztiak bilduko ditu berriro.
