Obrak egiteko aurreikusitako epea 14 hilabetekoa da, eta aurrekontua 1.011.952,33 euro gehi BEZa izango da.
DURANGO | Udalak aditzera eman duenez, gaurtik aurrera, uztailak 20, erabat itxiko dute Zabalarra eskolako esparrua. Julene Azpeitia haurreskola orain arte irekita egon da, eta zerbitzua amaitu ostean itxi dute. Hala ere, obretan erabiliko diren tamaina handiko makina eta zerbitzuak direla eta, eremua ixtea erabaki da, bertara joaten diren erabiltzaileen segurtasuna bermatzeko.
Neurri honen helburu nagusia eskolako instalazioak erabili ohi dituzten pertsona guztien babesa eta ongizatea bermatzea da. Esparrua itxita egongo da obrek irauten duten bitartean.
Eusko Jaurlaritzako Hezkuntza Sailak uztailaren 1ean eman zien hasiera Zabalarra Eskolako sukaldea eta jantokia handitzeko lanei. Proiektu honen helburua ikastetxearen azpiegitura hobetzea da, zentroan bertan janariak prestatu eta kontsumitzeko aukera emanez.
Handitze proiektuak beheko solairuan bolumen berri bat gehitzea eta haur hezkuntzan erabiltzen den sukaldearen hedapena jasotzen ditu. Gainera, sukaldearen funtzionamendurako beharrezkoak diren espazio gehigarriak sortuko dira, hala nola:
Biltegia
Sukaldeko langileentzako eta monitoreentzako aldagela bereiziak
Hondakinen eremua
Hotz-ganbera
Barruko eta kanpoko sarbideak dituzten ikasleentzako komun berriak
Obrek irauten duten bitartean, jantoki-zerbitzua martxan egongo da aldi baterako moduluak instalatuta, eta ikasleek eguneroko otorduak etenik gabe jasotzen jarraituko dutela ziurtatuko da.
Lanak egiteko 14 hilabeteko epea aurreikusten da, 1.011.952,33 euroko aurrekontuarekin (gehi BEZa).
