Tailerrak eta behaketa astronomikoak ere antolatuko dira Durangaldean
DURANGO | Durangoko Ezkurdi plaza zientziaren eta astronomiaren topagune bihurtu da gaurtik aurrera. Juan Ignacio Perez Iglesias Eusko Jaurlaritzako Zientzia, Unibertsitate eta Berrikuntza sailburuak “Bi ilunabarreko eguna – El día de los dos atardeceres” erakusketa ibiltaria aurkeztu du bertan. Ekimen didaktiko honen helburua datorren abuztuaren 12an Euskadin ikusgai izango den Eguzki-eklipse osoa herritarrei ezagutaraztea da.
Erakusketa lau totemek osatzen dute, ilustrazio zientifiko eta azalpen errazekin, eta herritar guztientzat egongo da zabalik Ezkurdi plazan ekainaren 1era arte. Euskadiko 13 udalerri zeharkatuko dituen ibilbidearen seigarren geltokia da Durangokoa.
Aurkezpen ekitaldian parte hartu dute Mireia Elkoroiribe Durangoko alkateak, Eider Ajuria Abadiñoko Gazteria zinegotziak eta eskualdeko elkarte laguntzaileen ordezkariek (Izarra Astronomia Elkartea, Bizenta Mogel Liburutegia eta Durangaldeko Artist Elkartea).
Perez Iglesias sailburuak nabarmendu duenez, erakusketa honekin “curiositatea piztu, zientziarekiko interesa indartu eta alfabetatze zientifikoa hobetu” nahi da. Bestalde, Mireia Elkoroiribek pozik agertu da Durango egitasmo honen parte izateagatik: “Ez dugu egunero zerura begiratzeko modua aldatuko duen fenomeno bat bizitzeko aukerarik. Erakusketa honek gelditzera, begiratzera eta esperientzia berezi hau zientziatik eta emozio kolektibotik partekatzera gonbidatzen gaitu”.
Durangon eta Abadiñon
Erakusketaz gain, Durangaldean jarduera osagarrien egitarau zabala koordinatu da datozen egunetarako, herritarrek eta familiek fenomeno historiko hau hobeto uler dezaten:
-
Durangon (Maiatzak 28, osteguna): Bizenta Mogel Liburutegiak “Ziano-astro-tipia” tailerra hartuko du helduentzat, Durangaldeko Artisten Elkarteak antolatuta.
-
Abadiñon (Maiatzak 30, larunbata): Virginia Garcia Aranzadi Zientzia Elkarteko astronomia saileko kideak “Argia eta itzalaren ikuskizuna” hitzaldia emango du. Horrez gain, umeentzako “Eklipseen misterioak” tailerra ere egingo da.
Egitasmo hau Jakindari (Euskadiko Kultura Zientifikorako Aliantza) sarearen barruan jaio da, eta hogei erakunderen baino gehiagoren laguntza du (DIPC edo Aranzadi, esaterako). Tailerren ordutegiak ikusteko edo abuztuko eklipsea modu seguruan behatzeko aholkuak ezagutzeko, informazio guztia eklipsea.euskadi.eus webgunean dago eskuragarri.
🔴 Proiektuaren gako nagusiak:
-
Zer ikusi: Lau totem didaktiko Durangoko Ezkurdi plazan ekainaren 1era arte.
-
Helburua: Herritarrak prestatu abuztuaren 12ko eguzki-eklipse historikoari begira.
-
Hitzorduak eskualdean: Helduentzako tailerra Durangon (maiatzak 28) eta hitzaldia zein haurrentzako tailerra Abadiñon (maiatzak 30).
