Merkatu moderno eta funtzionala, tradizioa eta modernitatea uztartzen dituena, 11 merkataritza postu eta tailerrak, dastaketak eta ekitaldiak egiteko espazio malguak eskainiko ditu
DURANGO | Merkatu Plazaren proiektu berriak aurrera jarraitzen du, gauzatzera bideratutako urrats sendoekin. Proiektuaren azken bertsioa eta etorkizuneko merkatuaren ezaugarriak apirila amaieran aurkeztu ziren, postuen emakidadunekin eta lan-taldeko gainerako eragileekin egindako bileran. Udalak obren lizitazioa argitaratu du dagoeneko eta interesdunek euren eskaintzak aurkez ditzakete maiatzaren 26ra bitarte, www.durango.eus webguneko kontrtatzailearen profilaren bidez.
Exekuzio fasea: lanak 2025eko uztailean hasiko dira
Proiektuaren exekuzioaren egutegia aurreikusitakoaren arabera doakio. Birgaitze lanak 2025eko uztaila eta iraila artean egingo dira, merkatuko merkatari zein baserritarrei ahalik eta eragin txikiena eragiteko diseinatutako planarekin. Epe horretan, azpiegitura egokitzeko, merkataritza-postuak berritzeko eta Durangoko gizarte- eta kultura-bizitza dinamizatzera bideratutako espazio berriak sortzeko lanak egingo dira.
298.920,60 euroko inbertsioarekin, Durangoko Udalak beharrezko baliabideak esleitu ditu merkatua, funtzionala izateaz gain, pertsona guztientzat erakargarria eta irisgarria izango dela ziurtatzeko. Merkatuaren birgaitzea ikuspegi integral batekin egingo da, barne egitura zein instalazioak berritzea barne, irisgarritasunari eta jasangarritasunari arreta berezia eskainiz.
Espazioa hainbat postuk osatzen dute, 1. postuarekin hasita (Jarduera irekia), 40,94 m²-ko azalerarekin, eta, ondoren, 2. postuarekin (Ozpinetakoak), 17,44 m²-ko azalerarekin. 3. postuak (harategia) 33,17 m² ditu, eta 4. postuak (Udala) 26,89 m². 5. postuak (0. KM) 34,34 m² ditu, eta 6. postuak (okindegiak) 24,86 m². 7. postuak (arrandegia) 25,40 m² ditu, eta 8. postuak (arrandegia edo bestelako elikagai-jarduera) 24,37 m². 9. postuak (harategia edo bestelako elikagai-jarduera irekia) 31,51 m² ditu, eta 10. postuak (urdaitegia) 14,06 m². Gainera, kafetegiak 26,08 m²-ko azalera du eta Hall-ak 520,76 m² hartzen ditu. Guztira, espazio guztien azalera 819,82 m²-koa da.
Mireia Elkoroiribe Durangoko alkateak nabarmendu duenez, “Merkatu Plaza birgaitzea Legegintzaldiko Planean jasotako proiektu estrategikoa da, Durangoren garapenarekin dugun konpromisoaren erakusgarri garbia. Proiektu honek ‘esan eta egin, hitza eman eta bete’ filosofia islatzen du, gure arlo adierazgarrienetako bat espazio moderno, irisgarri eta jasangarri bihurtuz, tokiko merkataritza bultzatzeaz gain, herritarren topaketa eta parte-hartzea ere sustatuko duena”.
Topaketarako eta interakziorako merkatua
Merkatu soila izatetik haratago, Merkatu Plaza topaketarako, bizikidetzarako eta herritarren partaidetzarako leku dinamiko bihurtuko da. Erabilera anitzeko espazioak diseinatu dira, non sukaldaritza tailerrak, kultur jarduerak eta gastronomia ekitaldiak egin ahal izango diren, tokiko tradizioa herritar guztiei hurbiltzeko. Ikuspegi berri horrek merkatua espazio dinamiko bihurtuko du, eta erosketak egiteko ez ezik, harremanetarako, bizikidetzarako eta ikaskuntzarako leku gisa ere balioko du.
Hall zabalak Baserritarren Azoka hartzeaz gain, plaza dinamizatzen eta berpizten lagunduko duten beste ekitaldi mota batzuk ere hartuko ditu, nagusiki gastronomikoak.
Gainera, merkataritza-postuen antolaketa berriak erosketa-esperientzia erosoagoa eta eskuragarriagoa eskaintzeko diseinatuta dago, pertsonen joan-etorri hobetuz eta merkatua merkataritza modernoaren beharretara egokituz, bere izaera tradizionala galdu gabe. Guztira 11 posturekin, espazioak egungo merkatariak eta tokiko merkataritza eta kultura zentro berritu honetan parte hartu nahi duten ekintzaile berriak hartzeko pentsatuta dago.
Obren lizitazioa eta lanpostuen emakidak
Datozen asteetan, birgaitze-obren lizitazioa egingo da. Fase hori bi etapatan egingo da: bata, espazio fisikoa birgaitzeko (dagoeneko martxan) eta egokitzeko, eta, bestea, merkataritza-postuetarako emakidetan zentratua, laster lizitatuko baitira.
Udala inplikatutako eragile guztiekin elkarlanean ari da, baita merkatari, baserritar eta herritarrekin ere, lizitazio prozesua bidezkoa izan dadin eta durangarreieta lehen eta hirugarren sektoreei mesede egin diezaien.
Merkatu jasangarria
Merkatu Plaza merkataritza gune izateaz gain, gune berde eta jasangarria ere izango da. Proiektuaren helburuekin bat etorriz, soluzio ekologikoak txertatuko dira instalazioetan, hala nola efizientzia energetikoko sistemak, eta material jasangarrien erabilera sustatuko da espazioa birgaitzeko.
Proiektuak teknologia berriak erabiltzea ere aurreikusten du, merkatuaren kudeaketa eta sustapena errazteko, erabiltzaileentzat zein merkatarientzat esperientzia modernoagoa eta eraginkorragoa ahalbidetuz.
Merkatu Plaza berria Durango biziberritzeko beste urrats bat da, tradizioa eta modernitatea dauden lekua, udalerri osoaren nortasuna eta ongizatea indartuko duen espazio irisgarri eta dinamiko bat sortzeko.
