DOT Durangaldea

94 655 00 33   info@dot.eus

Durango aliantzak ehuntzen Landakogunea azoka erreferentziazko gune gisa bultzatzeko

Mireia Elkoroiribe Durangoko alkatea eta Paule Sanchez Kultura zinegotzia Xabier Basañez BECeko zuzendariarekin batu dira

Iaz 49 ekitaldi hartu zituen guztira

DURANGO | Landako Gunearen etorkizunerako funtsezkoa den topaketa batean, Mireia Elkoroiribe Durangoko alkatea eta Paule Sánchez Kultura zinegotzia BECeko (Bilbao Exhibition Centre) zuzendari Xabier Basañezekin batu dira, lankidetza estrategikoan aurrera egiteko, espazio hori Euskadiko azoka, kongresu eta ekitaldien sareko erreferente gisa finkatu ahal izateko.

Landako Gunea funtsezko oinarria da Durangoko Udalaren ekonomia- eta kultura-garapenerako politikan. Euskadiko kongresu eta azoken sarean txertatzeko helburuarekin, BECekin izandako bilerak lankidetza-aukerak aztertzeko balio izan du, espazio horren hazkundea eta espezializazioa bultzatzeko.

Lankidetza horren bidez, baliabide eta aukera berriak eman nahi zaizkio Landako Guneari, eta gero eta gune erakargarriagoa bihurtu nahi da industria-enpresentzat, tokiko elkarteentzat eta ekitaldien antolatzaileentzat, sektoreko azoketarako, biltzarretarako eta eragin handiko jardueretarako erabil dadin.

Ekitaldien gune gisa duen funtziotik haratago, Udalak Durangok euskal eta euskarazko kulturaren egoitza gisa duen posizionamendua indartzea du helburu. Ildo horretan, kultur ekimen berriak sortzen eta erakartzen lan egingo da, udal instalazioak aprobetxatuz, programazioa dibertsifikatzeko eta urte osoan zehar kultur jarduerari jarraipena emateko, Durangoko Azokatik harago.

2024an, Landako Gunea Durangoko eta lurralde osoko jarduera kultural eta ekonomikoaren ardatz gisa finkatu zen, eta 49 ekitaldi hartu zituen guztira, hau da, 2023an baino %12 gehiago, orduan 42 ekitaldi egin baitziren. Hazkunde horrek erakusten du Landako Guneak gero eta interes handiagoa  pizten ari dela programazio anitz eta eragin handiko ekitaldiak hartzeko.

Utzi zure iruzkina

Zure e-posta helbidea ez da argitaratuko. Beharrezko eremuak * markatuta daude

This site uses Akismet to reduce spam. Learn how your comment data is processed.

Scroll to Top