Gazteak nekazaritzara eta abeltzaintzara erakartzeko azken ekimenak nabarmendu dituzte
DURANGALDEA | Une erabakigarria bizi du nekazaritza eta abeltzaintza ustiategien etorkizunak, eta landaeremuen jasangarritasuna bermatzeko, ezinbestekoa da belaunaldi berriek lekukoa hartzea. Errealitate horretaz jabetuta, Durangaldeko EAJko ordezkariek balioan jarri dute Bizkaiko Foru Aldundiak berriki abian jarritako laguntza multzoa. Neurri hauek belaunaldien arteko erreleboa errazteko eta lurraldeko zein eskualdeko lehen sektoreari egonkortasun ekonomikoa emateko diseinatu dira.
Alderdiko kideek azpimarratu dutenez, nekazaritza eta abeltzaintza funtsezkoak dira Durangaldeko lurralde-kohesiorako, baina baita paisaiaren kontserbaziorako, kulturari eutsi eta tokiko elikadura-subsubiranotasuna bermatzeko ere. Hala ere, gaur egungo erronkarik handienetako bat sektoreko langileen zahartzea da, eta horri aurre egin behar zaio.
Zuzeneko laguntzak eta dirulaguntzak
Eskualdeko bozeramaileek pozik hartu dute foru tresnek izango duten eragin positiboa; izan ere, zerga-pizgarriak, aholkularitza tekniko espezializatua eta finantzaketa-lerro bereziak uztartzen dituzte, ekintzaile gazteek hasieran izaten dituzten oztopoak gainditzeko. Besteak beste, nekazari gazteak lehen aldiz finkatzeko laguntzak eta lehendik dauden azpiegiturak berritzeko eta digitalizatzeko dirulaguntzak nabarmendu dituzte.
“Bizkaiko baserriek odol berria behar dute, baina gazteek lehen sektorearen aldeko apustua egin dezaten, erakargarria, errentagarria eta teknologikoki modernoa izan behar du. Foru sailak abiatutako neurriek horixe dute helburu: hasierako burokrazia murriztea, martxan jartzeko kostuak arintzea eta lehen urteetan segurtasun ekonomikoa ematea”, adierazi dute alderdi jeltzaletik.
EAJk gogora ekarri du Durangaldeak nekazaritza-sustrai oso sendoak dituela, eta zeharkako politika publikoen bidez babestu behar dela indar hori. Era berean, belaunaldi berriek dakartzaten merkaturatze-bide motzak eta jasangarritasunaren aldeko apustua aukera paregabea direla esan dute herriko ekonomia suspertzeko.
Pozizio horrekin, eskualdeko jeltzaleek foru erakundeekin eta sektoreko eragileekin elkarlanean jarraitzeko konpromisoa berretsi dute, laguntza hauen eragina gertutik jarraitzeko eta Durangaldeko baserriek bideragarri eta lehiakor jarrai dezaten bermatzeko.
