Dirulaguntzak eskatzeko epea maiatzaren 10era arte egongo da zabalik
AMOREBIETA-ETXANO | Zornotzako Udalak laguntza-deialdia ireki du gizarte-ekintzako arlorako, pertsonen autonomia sustatzeko eta mendekotasun, babesgabetasun, bazterkeria eta larrialdi-egoerei aurrea hartzeko eta arreta emateko helburua duten ekimen, proiektu eta/edo jardueretarako.
Deialdia udalerrian jarduerak dituzten edo zornotzarrei zuzendutako irabazi-asmorik gabeko erakunde eta elkarteei zuzenduta dago, baita noizean behin gizarte-ekimenak ordezkatzen dituzten pertsona fisikoei ere (udalerrian erroldatuta daudenak).
Finantzatuko diren proiektu eta/edo ekimenei dagokienez, lehentasuna emango zaie belaunaldi eta gaitasun desberdinen arteko berdintasuna, kulturartekotasuna eta elkartasuna sustatzen dutenei. Erakunde bakoitzak proiektu bakar baterako eskatu ahal izango du laguntza, eta dirulaguntzak honako alderdi hauek barne hartu ahal izango ditu:
Deialdiaren xedearekin lotutako jarduerak.
Azterlanak eta ikerketak (udalerriko gizarte-errealitateari eta/edo herritarren gizarte-premiei buruzkoak).
Herritarrak sentsibilizatzeko eta kontzientziatzeko proiektuak (Amorebieta-Etxanon garatzekoak)
Azpimarratzekoa da, beraz, udalerrian garatzen diren proiektuak baino ez direla finantzatuko. Halaber, deialdiko dirulaguntzetarako 30.000 euro bideratuko dira gehienez, eta aurkeztutako proiektuaren % 80 ere estaliko dute.
Eskaera egiteko epea
Eskaerak maiatzaren 10era arte egin ahal izango dira, Udalaren egoitza elektronikoaren bidez edo Herritarrentzako Arreta Zerbitzuaren bidez, aurrez aurre. Eskaera aurkezteko ezinbesteko betekizunei dagokienez, proiektuaren deskribapen-memoria idatzi behar da, gehienez ere 20 orrikoa.
Deialdi honekin, Amorebieta-Etxanoko Udalak gizarte-ongizatearekin eta komunitatean ekitatearekin duen konpromisoa indartzen du, eragin sozial handia duten proiektuetan tokiko partaidetza sustatuz.
