Udalak udalerriko ondarea, historia eta natura nabarmendu nahi ditu
DURANGO | Durangoko Udalak, udalerriaren nortasun turistikoa sendotu eta indartzeko asmoz, Durango Turismo marka berria jarri du martxan. Aurkezpena gaur goizean egin da Turismo Bulegoan, hiribilduaren erakargarritasun nagusiak nabarmentzeko asmoz, hala nola ondarea, historia eta natura, Santa Anako arkuaren silueta elementu naturalekin konbinatzen duen irudi adierazgarri baten bidez. Marka berriak ez du soilik ikur ezaguna izan nahi, Durango helmuga kultural eta natural gisa sustatzeko eta dinamizatzeko funtsezko tresna ere izan nahi du.
Marka honen helburua Durangoko nortasun turistikoa indartzea eta eskualdeko natura, historia eta kultura nabarmenduko dituen turismo iraunkorra sustatzea da. Marka hori udaleko turismo-zerbitzuaren erreferente bihurtuko da, eta Durangoko turismo-eskaintzaren sustapena eta komunikazioa erraztuko du, bai tokian-tokian, bai bisitarien artean. “Bultzatzen ari garen estrategia turistikoa, Durango Turismo markak ordezkatzen duena, turismo jasangarri bat sustatzean oinarritzen da, jarduera ekonomikoa bultzatu eta sektore estrategikoak indartuko dituena, hala nola ostalaritza eta merkataritza. Ikuspegi honen helburua ez da soilik udalerriko ondarea, historia eta natura nabarmentzea, baita turismoa Durangoko eguneroko bizitzan integratzea ere, tokiko komunitateari mesede eginez eta hiribildua estatuko eta nazioarteko bisitarientzat helmuga erakargarri eta zirraragarri gisa sendotuz, betiere modu jasangarrian», azaldu du Mireia Elkoroiribe udalerriko alkateak.
Durango Turismo markak zuzeneko eragina du online nahiz off line marketin-estrategian. Sare sozialetan, Interneten, gidetan, material grafikoan, sustapen-euskarrietan eta askotariko kanpainetan inplementatuko da, Durangoren nortasuna helmuga kultural eta natural gisa sendotuz. Gainera, Durango Turismo stand bat garatu da hirian ekitaldiak antolatzen laguntzeko, markaren nortasuna sortzen eta indartzen lagunduz.
Bestalde, Jesica Ruiz alkateordeak turismoko teknikarien ahaleginaren eta dedikazioaren garrantzia azpimarratu du, baita ekainaren 22an, 23an, 105 pertsonak parte hartu zuten bisita gidatuen emaitza bikainak ere. «Gure turismo-taldearen lan baliotsua azpimarratu nahi dut, funtsezkoa izan baita emaitza horiek lortzeko. Ekainaren 22ko eta 23ko bisitetan 105 pertsonak hartu zuten parte, eta datu hori oso positiboa da, gure udalerriarekiko interesa gero eta handiagoa baita. 2024ko ekainera arte, 9.251 bisitari izan ditugu, eta iazko aldi berean erregistratutako 8.833 bisitariak gainditu ditugu; horrek esan nahi du nabarmen hazi dela turista kopurua».
Halaber, seinaleztapena hobetzeko, baldosak berritzeko eta Yum Yum gida turistikoa eguneratzeko Udalak egindako etengabeko ahaleginak aipatu ditu, Durangon turismoa sustatzeko estrategia argi eta irmo baten zati gisa.
