Azaroaren 22ra bitartean egingo da ekimena, eta 3.000 euro banatuko dituzte 150 euroko 20 saritan
ABADIÑO | Abadiñoko Merkatari Elkarteak (AME), Abadiñoko Udalarekin elkarlanean, «Abadiñon erosi, zigilatu eta irabazi» kanpainaren edizio berri bat jarri du abian. Ekimenaren helburua udalerriko merkataritza, ostalaritza eta zerbitzuak sustatzea da, tokiko establezimenduetan erosketak egiten dituzten herritarren leialtasuna sarituz.
Kanpaina azaroaren 2tik 22ra egingo da, eta parte hartzeko, bezeroek kanpainari atxikitako sei establezimendu desberdinetako zigiluak bildu beharko dituzte pasaporte batean. Sei zigilu horietatik, gutxienez lau merkataritza- edo zerbitzu-establezimenduetakoak izango dira, eta gehienez bi ostalaritzako establezimenduetakoak.
Pasaporteak parte hartzen duten establezimenduetan banatuko dituzte, izakinak amaitu arte. Zigilu bakoitza lortzeko, gutxienez 10 euroko erosketa egin beharko da.
Pasaportea osatu ondoren, parte-hartzaileek La Costura de Mariaje dendan (San Andres kalea, 2) utzi beharko dute, kanpainarako prestatutako ontzian. Jasotako pasaporte guztien artean zozketa egingo dute, eta guztira 150 euroko 20 sari banatuko dituzte; guztira, 3.000 euro.
Kanpainaren oinarriak AMEren Instagram profilean (@amelkartea) eta labur.eus/AME-pasaporte-kanpaina-2026 helbidean kontsulta daitezke. Informazio gehiago nahi dutenek Abadiñoko Merkatari Elkartearekin harremanetan jar daitezke edo parte hartzen duten establezimenduetan galdetu.
