Gaurko 21 graduetatik asteburuko 27-28 graduetara igaroko gara
EGURALDIA | Egun hodeitsu eta gris batzuen ondoren, egoera hobetzeko joera izango du datozen egunetan. Gaurko hodeiek bidea utziko diete larunbateko eta igandeko eguzki eta beroari
Ostiralean eguna oso antzekoa izango da. Lainotuta egongo da eta euria egingo du tarteka, batez ere ipar partean, goizean eta eguerdi partean. Arratsaldeak aurrera egin ahala atertzera egingo du. Haizeak goizetik aurrera ipar eta ipar-mendebaldetik joko du, bolada gogor batzuekin. Tenperatura maximoetan aldaketa handirik ez dugu espero.
Larunbatean eguraldiak hobera egingo du goizetik aurrera. Goizaldean eta goizean goiz oraindik behe-hodeiak agertuko dira, ugariagoak Kantauri isurialdean. Hala ere, eguerditik aurrera eta arratsaldean zerua hodei gutxirekin geratuko da. Norabide aldakorreko haize ahula ibiliko da eta ipar-ekialdetik finkatuko da eguerdi inguruan. Tenperatura maximoak nahikoa igoko dira, batez ere barnealdean.
