14.658 euroko inbertsioa du, gehi BEZa, eta horri 17.470 euro gehituko zaizkio azpiegiturak egokitzeko, seinaleztatzeko eta geltokiak prestatzeko
DURANGO | Udalak herriko autobus-zerbitzu berria jarri du abian gaur, uztailaren 1ean. Ekimen hau pilotu-fasean egongo da uztailaren 31ra bitarte, haren funtzionamendua aztertzeko, ordutegien egokitasuna egiaztatzeko eta auzoetako benetako eskaria ezagutzeko, behin betiko ezartzeko aukera baloratu aurretik.
Probaldian zerbitzua doakoa izango da, eta astelehenetik ostiralera emango da, 11:00etatik 14:00etara eta 16:30etik 21:00etara, 40 minutuko maiztasunarekin. Ibilbideak 13 geltoki izango ditu, udalerriko hainbat auzotan banatuta, eta ibilbide osoa egiteko 27 minutu inguru beharko dira. Ibilbidea Madalenan hasiko da eta ondoren Olleria, Faustekalea, Zirarmendieta eta Larrasoloeta igaroko ditu, Gerediaga eraikinaren eta Durango Irratiaren ondoan. Jarraian, autobusa Zumar kalerantz joango da eta Tabira ingurura iritsiko da, zehazki Bizkaibuseko egungo geltokira Ibaizabal inguruan. Biribilgunea inguratu ondoren, ibilgailua Tabira kalera sartuko da igerilekuetaraino eta handik herrigunera itzuliko da Gasteiz Bidetik Kurutziagarantz. Azkenik, ibilbideak Otamotzena Aramotz, Sasikoa eta Fray Juan de Zumarraga aldera jarraituko du institutuaren aurrean eta berriz ere Madalenara.
Autobusak 49 eserleku, zutik joateko 24 plaza eta mugikortasun urriko pertsonentzat bi gune ditu, zerbitzuaren irisgarritasuna bermatuz.
Zerbitzu pilotu hau martxan jartzeak 14.658 euroko (gehi BEZa) kostua izan du. Horrez gain, 17.470 euroko inbertsio gehigarria egin da azpiegitura egokitzeko, geralekuak pintatzeko eta seinaleztatzeko lanetarako.
Proba fase honen bidez, Udalak zerbitzuaren benetako erabilera ezagutu eta behin betiko ezarpena baloratzeko beharrezko informazioa batu nahi du.
