Lehen fasean, futbol zelaia eta harmailak berrituko dira
AMOREBIETA-ETXANO | Txolon Futbol Zelaia, Amorebieta‑Etxanoko Txolon auzoan kokatua, udalerriko futbol eta bestelako kirol jardueretarako erreferentziazko gunea da. Astero 400 gazte inguru elkartzen dira bertan, eta horrek agerian uzten du espazio honek tokiko gazteen jarduera fisikoa sustatzeko duen garrantzia. Amorebieta‑Etxanoko Udalak kirolaren sustapenarekin duen konpromisoari eutsiz, helburua da instalazio moderno, irisgarri eta jasangarriak eskaintzea, erabilera intentsiboagoa, anitzagoa eta berdinzaleagoa ahalbidetzeko.
S.D. Amorebietako zuzendaritza batzordearekin eta gurasoekin egindako bilerak kontuan hartuta, Udalak Txolongo kirol instalazioak berrituko ditu. Horretarako, Bizkaiko Foru Aldundiari dirulaguntza eskatuko dio, 2026 eta 2028 artean egingo diren inbertsioak finantzatzeko. Proiektua bi fasetan garatuko da, guztira 1,5 milioi euroko inbertsioarekin.
Lehen fasean, futbol zelaia eta harmailak berrituko dira, joko‑eremua eta ikusleen espazioa hobetzeko. Soropila berrituko da eta harmailak egokituko dira, ikusleek esperientzia erosoagoa eta irisgarriagoa izan dezaten. Fase hau funtsezkoa da instalazioak partidak eta entrenamenduak baldintza egokietan hartzen jarrai dezan.
Bigarren fasean, aldageletako hobekuntzak egingo dira, espazioak eta zerbitzuak egungo beharretara egokituz. Helburua da kirolariek instalazio modernoagoak, irisgarriagoak eta funtzionalagoak izatea, eta segurtasuna eta erosotasuna hobetzea, bai jokalarientzat bai entrenatzaileentzat.
Ainhoa Salterain alkateak nabarmendu du: “Txolongo futbol zelaia udalerriko kirol jarduerarako gune giltzarria da, eta ezinbestekoa da bere instalazioak hobetzea. Berrikuntza honen bidez, espazio modernoagoa, irisgarriagoa eta jasangarriagoa eskaini nahi da, egungo eta etorkizuneko beharretara egokitua. Inbertsio honek kirolaren praktika sustatzen jarraitzeko bidean ekarpen garrantzitsua egingo du.”
