“Elorrioko soinuak” izango da aurtengo gaia, herritarren begietatik herria irudikatzeko
ELORRIO | Udaleko Euskara Sailak 2027ko egutegia osatzeko argazki-lehiaketa abian jarri du. Aurreko edizioetan izandako harrera onaren ondoren, ekimen honen helburua herritarrak egutegiaren sorreran inplikatzea eta udalerriko bizitza kulturalean parte har dezaten sustatzea da.
Aurtengo lehiaketaren gaia “Elorrioko soinuak” da. Parte-hartzaileak Elorrioko soinuak irudietan jasotzera gonbidatzen dira, entzuten dena ez ezik sentitzen dena ere islatu dezaten: herriko tradizioak eta jaiak, eguneroko bizitza, natura eta ingurunea, lanbideak, kaleetako giroa edo bizitza soziala. Helburua herriaren nortasuna eta bizitza irudien bidez adieraztea da.
Lehiaketara argazkiak zein ordenagailuz egindako argazki-konposizioak aurkeztu ahal izango dira. Guztira 13 irudi aukeratuko dira, hamabi hilabeteetarako bana eta egutegiaren azalerako beste bat. Irudi sarituek 100 euroko bonoa jasoko dute, Elorrioko tokiko dendetan edo jatetxeetan erabiltzeko.
Parte hartu ahal izateko, Elorrion erroldatuta egon behar da eta 16 urte beteta izan aurkezteko epea amaitzen den egunean. Egile bakoitzak gehienez bi argazki aurkeztu ahal izango ditu, JPG formatuan eta egutegiaren diseinura egokitutako formatu horizontalean.
Lanak aurkezteko epea 2026ko irailaren 26an amaituko da. Argazkiak Udalaren webguneko tramite bidez bidali ahal izango dira edo zuzenean Udaleko HAZ-SAC zerbitzuan aurkeztu.
Epaimahaia udaleko ordezkariek eta argazkilaritzan adituak diren herritarrek osatuko dute, eta berdintasun-irizpideak bermatuko dira bere osaeran. Hautatutako irudiek 2027ko Elorrioko egutegia osatuko dute, herritarren begietatik sortutako irudiekin.
Elorrioko Udalak herritarrak animatu nahi ditu beren begiradatik Elorrio irudikatzera, herriaren soinu, paisaia eta eguneroko bizitza argazkien bidez jasoz.
