Parte-hartzaileen artean, 300 euroko 15 sari zozketatuko dira, tokiko saltokietan gastatzeko
DURANGO | Bizkaiko Foru Aldundiak bultzatutako “Bizkaiko merkataritza: Oso Pro” kanpainako ekintza ibiltaria kalean gauzatuko da lurraldeko 8 udalerritan (Barakaldon, Bilbon, Durangon, Gernika-Lumon, Getxon, Mungian, Ondarroan eta Zallan). Zuzenean gerturatuko zaizkie herritarrei, eta tokiko saltokien arteko profesionalenak, proaktiboenak eta gertukoenak errekonozituko dituzte.
Kanpaina gaur hasiko da, martxoaren 7an, Barakaldon. Ibilbidea hor hasita, martxoan zeharreko asteburuetan, Bizkaiko beste herri batzuetan ere ibiliko da. Geldialdi bakoitzean informazio-gune bat jarriko da, eta talde dinamizatzaile batek herritarrak animatu eta gonbidatuko ditu aukeratu eta izendatu ditzaten «oso pro»tzat jotzen dituzten saltokiak.
Tokiko saltokiak ikusaraztea eta euren balioa nabarmentzea da ekintza horren helburua. Halaber, lotura indartsuagoak ezarri nahi dituzte herritarren eta gertuko saltokien artean, auzoetako eta udalerrietako eguneroko bizimoduaren parte baitira.
Herritarrek saltoki «oso pro» bat hautatzeko parte-hartzea
Bizkaiko edozein adin nagusikok har dezake parte kanpainan. Parte hartzeko, lurraldeko hiru saltoki proposatuko ditu, hiru gehienez, bere ustez tokiko merkataritzaren balio hauek ondoen islatzen dituztenen artean: arreta emateko profesionaltasuna, bezeroekiko gertutasuna, berritzeko gaitasuna, eta ingurunearekiko konpromisoa.
Izendapenak erraz egin daitezke, bai inprimaki digitalaren bidez, bai herrietan jarritako informazio-guneetan eskuragarri egongo diren txartel fisikoen bidez.
Parte-hartzea areagotzeko, izendapena zuzen betetzen duten pertsona guztien artean, 300 euroko 15 sari zozketatuko dira, Bizkaiko saltoki txikietan gastatzeko. Bonu horiek lurraldeko saltoki txikizkarietan erabili ahal izango dira (adibidez, dendetan, ile-apaindegietan edo artisau-lantegietan), eta, horrela, eragin zuzen eta handiago bat izango du kanpainak tokiko merkataritza-sarean.
Bizkaiko eskualdeetan barrena
Gaur, Barakaldon hasiko da. Gero, martxoan, ekintza ibiltariak beste udalerri batzuk bisitatuko ditu:
– martxoak 7. Barakaldo. (Herriko plaza)
– martxoak 7. Getxo (Metro geltokiko plaza. Algorta)
– martxoak 13. Durango (Ezkurdi plaza)
– martxoak 14. Gernika-Lumo (Domingo Alegría plaza)
– martxoak 14. Mungia (Euskal Pizkundea Etorbidea)
– martxoak 20. Zalla (Hermanos Maristas Hiribidea)
– martxoak 21. Ondarroa (Itxas Aurre plaza)
– martxoak 21. Bilbao
Kanpaina lurraldeko eskualde batera baino gehiagotara eraman nahi dutelako hautatu dituzte leku horiek, eta merkataritza-guneetan eta joan-etorri handiko guneetan jarriko dira herritarrek errazago har dezaten parte.
Bizkaiko saltoki txikiak handi egiten dituztenentzako aintzatespena
Izendapen gehien hartzen dituzten saltokien artetik hautatuko ditu epaimahai profesional batek kanpainako balioak ondoen islatzen dituztenak, eta ekimenaren hurrengo fasera igaroko dira.
“Bizkaiko merkataritza: Oso Pro” kanpainak saltokiei euren lana aitortu nahi die, garrantzitsuak direlako tokiko ekonomia suspertzeko, auzoetan bizitza pizteko, eta erosketa esperientzia hurbila, profesionala eta kalitatekoa izateko.
