Zerbitzua Haur eta Lehen Hezkuntzako umeei zuzenduta dago, eta jarraipena ahalik eta arinen bermatzea da udalaren helburua
ATXONDO | Udalak ludoteka eta udaleku zerbitzuak kontratatzeko lehiaketa publikoa martxan jarri du, guztira 23.000 euroko aurrekontuarekin (BEZ barne). Esleipena urtebetekoa izango da, eta beste urtebetez luzatzeko aukera aurreikusten da. Lehiaketako informazio guztia udaleko webguneko, ‘Kontratatzailearen profila’ atalean dago eskuragarri eta baita udaletxean bertan ere. Proposamenak aurkezteko epea urtarrilaren 26ra artekoa da.
Zerbitzua Haur Hezkuntzako eta Lehen Hezkuntzako haurrei zuzenduta dago. Ludoteka urtean 10 hilabetez eskainiko da, astelehenetik ostiralera, 16:30etik 18:30era, eta udan udalekuak egingo dira.
Lehiaketa honen bidez, Udalak aisialdi hezitzailea eta kalitatezkoa bermatzen jarraitu nahi du, herriko haurrentzat espazio parte-hartzailea eskainiz. Zerbitzua ahalik eta azkarren berriro herritarren eskura jartzea da helburua.
Testuinguru honetan, Atxondoko Udalak eskerrak eman nahi dizkie orain arte ludoteka zerbitzua kudeatu duten arduradunei, hainbat urtez egindako lanagatik. Aktiboki parte hartu dute herriko bizitzan eta ekimen ugaritan: besteak beste, On Martin egunean, Gazteñerren, Arimen Gauan, Iñauterietan, eta herrian egindako bestelako jardueretan. Haurrentzako askotariko proposamenak eskainiz, herriko egunerokoaren parte izan dira urte hauetan guztietan.
