Herri lasterketak hainbat kategoria izango ditu
ELORRIO | Dena prest larunbat honetan Elorriok Santxibiriren edizio berri bat har dezan. Durango Kirol Taldeak antolatuta, Anboto Kirol Eskolen Elkartearen aholkularitza teknikoarekin, lasterketa nagusia 12:30ean hasiko da plaza nagusitik. Zirkuituari dagokionez, 5,5 kilometro izango ditu, bi itzuli egin beharko dira eta herrigunetik eta inguruko auzo batzuetatik igaroko da. Proba herrikoia izango da eta herritar guztiei zuzenduta dago.
Haurren atalean, 11:30ean korrika egin ahal izango dute haurrek, antolatutako hainbat ibilbidetan. 2010-2011koek eta 2012-2013koek bi itzuli emango dizkiote zirkuituari; 2014-2015ekoek eta 2016an edo geroago jaiotakoek, berriz, itzuli bat. Izena egun berean eman ahal izango da plazan (5 euro) eta bildutako dirua atletismo eskolara bideratuko da. Dortsalak 09:00etatik 11:00etara bitartean banatuko dira.
