Azaroaren 2tik 4ra salduko dituzte bonuak Sanfuentesen, Las Carrerasen eta Gallartan
ABANTO-ZIERBENA | Udalak eta herriko Merkatarien eta Ostalarien Elkarteak (A.C.H.A.) Merkataritza Bonuaren XXVI. kanpaina jarriko dute martxan. Guztira, 30 euroko 1.200 bonu jarriko dituzte salgai, bakoitza 20 euroan. Horrela, erosleek % 33 inguruko aurrezkia izango dute, eta herriko merkataritzan, ostalaritzan eta zerbitzuetan kontsumitzea sustatuko dute.
Kanpainari atxikitako 65 establezimendutan erabili ahal izango dira bonuak: 47 Gallartan daude, bederatzi Sanfuentesen eta beste bederatzi Las Carrerasen, horietako bat Parke Teknologikoan. Saltokien zerrenda udalaren webgunean argitaratuko dute, eta parte hartzen duten negozioek kanpainaren kartela eta identifikazio-eranskailua izango dituzte ikusgai.
Udalerrian erroldatutako pertsonek soilik erosi ahal izango dituzte, eta azaroaren 30era arte erabili ahal izango dira 65 saltoki eta zerbitzutan
Bonuen salmenta, hiru auzotan
Bonuak azaroaren 2an, 3an eta 4an jarriko dituzte salgai, auzo bakoitzean 400 bonu eskainita. Egun bakoitzean bi salmenta-txanda egongo dira: 200 bonu goizez, 09:30etik 11:30era, eta beste 200 arratsaldez, 17:00etatik 19:00etara.
- Azaroak 2, astelehena: Sanfuenteseko Eskola Zaharrak.
- Azaroak 3, asteartea: Las Carreraseko udal-liburutegia.
- Azaroak 4, asteazkena: Gallartako Enplegu eta Tokiko Garapen Agentzia.
Bonuak agortzen ez badira, hurrengo egunetan ere erosi ahal izango dira Gallartako agentzian, 09:30etik aurrera, izakinak amaitu arte.
Bonuak erosteko, ezinbestekoa izango da Abanto Zierbenan erroldatuta egotea. Pertsona bakoitzak gehienez bi bonu erosi ahal izango ditu, bere NANa eta udalerrian erroldatuta dagoen beste pertsona baten NANa aurkeztuta. Behar bezala justifikatutako kasuetan, NANaren fotokopiak ere onartuko dituzte. Eskudirutan edo txartelarekin ordaindu ahal izango da, baina ezin izango da ilaran tokirik gorde beste pertsona batentzat.
Azaroaren 30era arte
Bonuak azaroaren 2tik 30era bitartean erabili ahal izango dira, bi egunak barne. Epe hori igarota, ez dute baliorik izango. Bonu bakoitza lau zatitan banatuta dago: 10 euroko bi txartel eta 5 euroko beste bi.
Erosketaren zenbatekoa erabilitako bonuaren balioa baino txikiagoa bada, ez da aldea eskudirutan itzuliko. Bonuak ezin izango dira diruaren truke aldatu, eta produktu bat itzultzen bada, establezimenduak erosketa osoaren zenbatekoa jasotzen duen bale bat emango du.
Kanpainari atxikitako saltokiek jasotako bonuak zigilatu eta Enplegu eta Tokiko Garapen Agentzian aurkeztu beharko dituzte, erosketa bakoitzaren tiketa edo fakturarekin batera. Horretarako epea azaroaren 2tik abenduaren 15era egongo da zabalik. Ondoren, Udalak dagokion zenbatekoa banku-transferentzia bidez ordainduko die establezimenduei.
Informazio gehiago eskuratzeko, Enplegu eta Tokiko Garapen Agentziara jo daiteke (Bizkaia plaza, 5), astelehenetik ostiralera, 09:30etik 14:30era, edo udalaren webgunea kontsultatu: www.abanto-zierbena.eus.
