Horietatik 18 genero indarkeriagatik izan ziren, 4 familia barruko indarkeriagatik eta 2 sexu indarkeriagatik
DURANGO | Durangoko Udalak 2025eko uztailetik irailera bitartean udalerrian artatutako indarkeria matxistako kasuei buruzko datuak jakinarazi ditu. Argitalpen honek, beste behin ere, gobernu taldeak giza eskubideen urraketa larri horren aurka borrokatzen duen konpromisoa berresten du, beti ere gardentasunaren eta sentsibilizazioaren printzipioei jarraiki.”
Urteko hirugarren hiruhilekoan, indarkeria matxistako 24 kasu erregistratu dira guztira Durangon. Horietatik, 18 genero-indarkeriakoak izan ziren, eta hainbat indarkeria-mota sartu ziren, hala nola sexuala, fisikoa, psikologikoa eta ekonomikoa. Gainera, familia barruko 4 indarkeria-kasu eta 2 sexu-indarkeriako kasu artatu ziren.
Durangoko Indarkeria Matxistaren Unitateak (IMU), Andragunean kokatuta dagoenak, 10 kasutan esku hartu du. Horietatik 4 Ertzaintzaren bidez iritsi ziren, 1 Osakidetzatik eta 5 udal-unitatearen beraren bidez sartu ziren zuzenean. Nabarmentzekoa da Ertzaintzak bideratutako kasuetako batek ez zuela salaketa formalik aurkeztu, eta beraz, ez dela erakunde arteko protokoloan sartu.
Hasierako arretaren ondoren egindako bideratzeei dagokienez, 14 pertsona Oinarrizko Gizarte Zerbitzuetara bideratu ziren, 4 ESNATU zerbitzura, laguntza psikologiko espezializatua eskaintzen duena, eta 1 Krisi Zentrora, sexu-indarkeriako egoeretan premiazko arreta ematera bideratua.
Jesica Ruiz Berdintasun zinegotziak datuak aztertu ditu, eta honakoa azpimarratu du: “”Artatutako kasu bakoitza indarkeria matxistak gure gizartean eragiten jarraitzen duen kalte sakonaren adierazgarri da. Horregatik, Udalak gure konpromisoa indartzen du eraginkortasunez eta hurbiltasunez jarduteko, emakumerik babesik gabe geratuko ez dela bermatuz.” Halaber, honako hau gaineratu du: “Ezinbestekoa da antzemate, arreta eta bideratze bideak sendotzea, eta sentsibilizazio kolektiboa lantzen jarraitzea. Horrela bakarrik lortuko dugu errealitate horiek denbora luzeegian ikusezin bihurtu dituen isiltasunarekin eta normalizazioarekin haustea.”
Durangoko Udalak gogorarazi du Indarkeria Matxistaren Unitateak (IMU) funtzionamendu normalarekin jarraitzen duela, arreta espezializatuko udal baliabide gisa. Unitate hori Andragunean dago (Lariz Torre 2), prestakuntza espezializatua duen teknikari batek kudeatzen du, eta indarkeria egoeran dauden emakumeei laguntza, orientazioa eta banakako laguntza eskaintzen dizkie. Bere ordutegia astelehen, asteazken eta ostiraletan 09:00etatik 15:00etara da, eta astearte eta ostegunetan 11:00etatik 14:00etara eta 16:00etatik 19:00etara. Hala ere, oporraldietan ordutegi hori alda daiteke, eta, beraz, aldez aurretik harremanetan jartzea gomendatzen da. Horretarako, 618 791 333 eta 94 603 00 46 telefonoak eta misasi@durango.eus helbide elektronikoa daude euskuragarri.
Era berean, Udalak gogorarazi du herritarren eskura dauden beste zerbitzu funtsezko batzuk: Oinarrizko Gizarte Zerbitzuak, astelehenetik ostiralera 09:00etatik 13:00etara 946 200 492 telefonoan artatzen dituztenak; Gizarte Larrialdietako Foru Zerbitzua, 24 orduko arreta ematen duena 944 025 050 telefonoaren bidez; Sexu Indarkeriako Krisi Zentroa, 24 orduetan aktiboa 900 84 09 77 telefonoan; eta SATEVI, Indarkeriaren Biktima diren Emakumeei Laguntzeko Telefono Zerbitzua, 24 orduko erabilgarritasunarekin 900 840 111 zenbakian. Horrez gain, Durangoko ertzain-etxearekin harremanetan jar daiteke 944 66 93 00 telefonoan, Udaltzaingoarekin 946 03 00 10 telefonoan, eta larrialdi-egoeretan, 112 telefonora berehala deitzea gomendatzen da.
Azkenik, Udalak nabarmendu du indarkeria matxistaren aurkako borrokak konpromiso irmo eta etengabea eskatzen duela. Zinegotziaren hitzetan: “Ezin dugu beste aldera begiratu. Identifikatzea, laguntzea eta jardutea guztion ardura da. Indarkeria matxista ez da arazo pribatua; egiturazko arazo bat da, eta erantzun kolektibo, irmo eta etengabea behar du.”
