Azaroaren 2tik 25era bitartean egingo dituzte grabazioak hiriko hainbat tokitan
URDUÑA | Zinema-eszenatoki bihurtuko da berriro datozen asteetan. Hirian grabatuko diren bi ikus-entzunezko produkzioek trafikoan eta oinezkoen joan-etorrietan etenaldi puntualak eragingo dituzte, baita bide publikoaren aldi baterako okupazioak ere. Eragozpenak azaroaren 2tik 25era bitartean izango dira.
Udalak jakinarazi duenez, eraginak hiriko hainbat gunetan nabarituko dira, eta une oro koordinatuta eta behar bezala seinaleztatuta egongo dira, bizilagunei ahalik eta traba gutxien eragiteko.
Lehenengo filmaketa
Lehenengo produkzioaren grabazioak udalerriko hainbat tokitan egingo dituzte azaroaren 2tik 4ra bitartean, nahiz eta hilaren 6an ere trafikoan eraginak aurreikusi diren.
Astelehen honetan, trafikoan eta oinezkoen joan-etorrietan tartekako mozketak egingo dituzte Antiguako pasealekuko sarbideetan eta BI-4906 errepidean, 0 kilometro-puntuko biribilgunearen eta Delikarako sarbidearen arteko zatian.
Bihar, asteartean, murrizketak Otxomaio etorbidearen ingurura lekualdatuko dira. Han ere zirkulazioan eta oinezkoen joan-etorrietan etenaldi puntualak egingo dituzte.
Asteazkenean, hilak 4, Donibane kalea trafikoari itxita egongo da 06:00etatik 10:00etara, Foru plazaren eta Mikel Deuna kalearen arteko zatian. Horrez gain, goizean zehar tartekako mozketak egingo dituzte Donibane kalean, Kale Nagusian, Foru plazan, Artekalen, Burdin kalean eta Andra Mari plazan.
Azkenik, azaroaren 6an, ostiralean, Frankos kalea trafikoari itxita egongo da 11:00etatik 16:00etara, Foru plazaren eta Mikel Deuna kalearen artean. Foru plazaren inguruan ere tartekako mozketak egingo dituzte.
Bigarren filmaketa
Bigarren produkzioaren grabazioek batez ere Turismo Bulegoan eta Udalean izango dute eragina.
Turismo Bulegoan azaroaren 18an eta 20an egingo dituzte grabazioak, 08:00etatik 13:00etara. Udaletxean, berriz, hilaren 23tik 25era arituko dira, 07:00etatik 18:00etara.
Udalak herritarrei jakinaraziko dizkie grabazioen ondorioz sor daitezkeen eragozpenak, datak hurbildu ahala. Era berean, herritarren lankidetza eta ulermena eskertu ditu, lanek sor ditzaketen eragozpenen aurrean.
