Aste honetako Osoko Bilkurak ontzat eman ditu datorren urtean indarrean sartuko diren zerga tasa eta tasa berriak
BERRIZ | Udalak 2026ko ekitaldirako ordenantza fiskalen aldaketa onartu du, presio fiskala eskualdeko udalerrietako batez besteko mailetara egokitzeko eta herritarrei eskaintzen zaizkien zerbitzu publikoen iraunkortasuna bermatzeko.
Zergei dagokienez, Ondasun Higiezinen gaineko Zergaren (OHZ) eta Plusbalioaren tasak igo dira, udal diru-bilketa inguruko beste udal batzuenarekin parekatu eta tokiko zerbitzuen kalitateari eutsi ahal izateko. Trakzio Mekanikoko Ibilgailuen gaineko Zerga (TMIZ) %1 igoko da, eta Jarduera Ekonomikoen gaineko Zerga (JEZ) eta Eraikuntza, Instalazio eta Obren gaineko Zerga (EIOZ) izoztuta egongo dira, aurreko ekitaldiarekin alderatuta aldaketarik gabe.
Udal-tasei dagokienez, oro har % 2,5eko igoera aplikatuko da. Ur-hornidurako zerbitzua % 6 igoko da, kudeaketa- eta mantentze-kostuak handitu egin direlako. Bestalde, hondakinak biltzeko eta ezabatzeko zerbitzuak % 15etik gorako igoera izango du. Igoera hori beharrezkoa da ekonomia zirkularrerako hondakinei eta lurzoru kutsatuei buruzko Europako apirilaren 8ko 7/2022 Legea betetzeko. Izan ere, lege horrek bilketa- eta tratamendu-sistemak ingurumen-irizpide zorrotzagoetara egokitzera behartzen ditu udalerriak.
Udalak azpimarratu du ordenantzak eguneratzearen helburua udal-zerbitzu iraunkorrak, kalitatezkoak eta araudi berriekin bat datozenak bermatzea dela, eta, aldi berean, zerga politika orekatua eta Berrizko errealitate ekonomikoarekin arduratsua izatea.
