Herrialdeka egin diren txapelketetako txakurrik onenak izango dira
GARAI | Garaiko Aiartza auzoan, Euskal Herriko artzain txakurrik onenak lehiatuko dira irailaren 13an, larunbatarekin, arratsaldeko 5etan. Herrialdeka egin diren txapelketetako txakurrik onenak izango dira. Ekitaldiko sarrera doakoa izango da.
Txapelketa antolatzeko ardura nagusia Garaiko Udalak badu ere, Gerediaga Elkarteak, Euskal Herriko Artzain Txakurren Elkarteak (EHATE) eta Urkiola Landa Garapenerako Elkarteak lagundu dute ekimenean.
Aurten, 52 urte beteko dira Euskal Herriko Artzain Txakurren txapelketa antolatzen hasi zela. Lehenbiziko txapelketa Garain, Goierrin auzoan, egin zen, 1973ko irailaren 16an. Irabazlea, Arabako Zuatzako Montes de Jesús Azpiazu izan zen. Harrezkero, Garain, txapelketa 1981ean, 1988an, 1997an, 1999an, 2021ean eta 2023an egin da. Horiek horrela, aurtengoa 7. aldia izango da Euskal Herriko Artzain Txakurren Txapelketa Garain antolatzen dena.
Gogorarazi behar da azken urteotan txandaka antolatu dela txapelketa hau Atxondon eta Garain.
Aurtengoa 57. edizioa izango da eta 11 txakurrek parte hartuko dute. Honako hauek:
2024an, Atxondon (Axpen), egindako Euskal Herriko Artzain Txakurren Txapelketako txapelduna:
MENDI Javier Zubiaurre Mutriku
| MENDI | Javier Zubiaurre | Mutriku |
Herrialdeka egin diren txapelketetako txakurrik onenak:
| ARABA | ||
| TXAKURRA | ARTZAINA | HERRIA |
| LIS | Fidel Alonso | Areta |
| SUA | José Mª Jauregi | Ilarduia |
| BIZKAIA | ||
| MENDI | Carlos Ardanza | Abadiño |
| NEGU | Marcos Aspizua | Orduña |
| BASERRI | Juan José Egurrola | Etxebarria |
| GIPUZKOA | ||
| FIDEL | Aitor Tato | Ataun |
| ARGI | Javier Zubiaurre | Mutriku |
| ZEU | Jose Mª Bengoa | Oñati |
| NAFARROA | ||
| MENDI | Jesús Razkin | Etxarri Aranaz |
| LAGUN | Jorge Oteiza | Oronoz |
Txapelketan, bi ariketa izango dira:
1. ariketa. Zazpi minuturen barruan, artzainaren esanetara, txakurra artaldera joango da, baina zelaiaren barrenetik; bidean bi aldiz geldiaraziko da txakurra epaimahaikoak esandakoan. Ondoren, artaldera sartu eta zelai erdian dagoen hesiaren tartetik igaroz artzaina dagoen lekura ekarriko ditu ardiak. Ardiak eta txakurra artzainaren inguruan geldi egon beharko dira, epaimahaikoek esan arte. Hori egin ondoren, epaileen esanetara, eskuineko edo ezkerreko hesi-tartetik igaro beharko dira ardiak.
2. ariketa. Zazpi minuturen barruan, artzainaren esanetara, banderatxoz seinalatutako bidetik joan beharko du txakurrak, ardietara hurreratu, artaldea hartu eta erdian dagoen eskortan sartzen saiatu beharko du. Ardi guztiak sartzen lortuz gero, ondoren, zakarkeriarik gabe atera beharko dira.
