Hodei ugari, zaparrada batzuk eta 25 graduren inguruko tenperaturak hurrengo egunetarako
EGURALDIA | Abuztuaren amaiera heldu da, udazkeneko kutsua udakoa baino handiagoa delarik. Hodei asko, ostarte batzuk, zaparradak eta 25 gradu inguruko tenperaturak izango dira eguraldiaren ezaugarri nagusiak datozen egunetan.
Ostirala, grisa
Ostiralean Kantauri isurialdean hodeiak nagusituko dira eta zaparrada batzuk botako ditu, batez ere kostaldetik hurbil eta egunaren erdiko orduetan. Hegoaldean hodeitza saretuago egongo da, baina euri pixka bat egin dezake. Arratsaldeak aurrera egin ahala ostarte zabalak agertuko dira. Egunaren hasieran hego-mendebaldeko haizea ibiliko da, gero mendebaldera aldatu eta indartu egingo da, kostaldean nabarmen, bertan bolada oso gogor batzuekin ibiliko da. Tenperatura maximoek gora egingo dute eta udaberri itxurakoak izango dira.
Larunbata, ostarteak
Larunbatean hegoaldean eguzkia izango da jaun eta jabe, goizean goiz lainogune batzuk agertuko diren arren; egunean zehar goi-hodeiak ere ager daitezke. Ipar partean eguna moteletik hasiko da, goizean behe-hodeiak agertuko dira eta euria utz dezakete, bereziki kostaldean eta goizean goiz. Orduek aurrera egin ahala ostarte zabalak irekiko dira eta eguzkitsu geratuko da. Tenperaturak gora egingo du eta giroa udakoa izango da. Egunaren hasieran eta amaieran hego-haizea ibiliko da, arratsaldean iparraldekoa, bolada gogor batzuekin barnealdean.
