Herritarrentzako Arreta Zerbitzuaren (HAZ) ondoan instalatutako gailuak hainbat izapide doan egiteko aukera emango du
DURANGO | Dokumentazioa Eguneratzeko Puntua (PAD) ezarri du Durangoko Udaleko harreran Polizia Nazionalak. Autozerbitzuko gailu honi esker, herritarrek erraz eta doan egin ahal izango dituzte NAN elektronikoarekin lotutako hainbat izapide.
Gailua Durangoko Udaletxeko eraikinean dago, Herritarrentzako Arreta Zerbitzuaren (HAZ) ondoan, eta udal eraikinaren ordutegian egongo da erabilgarri. Erabilera autonomoa eta erraza du, eta herritarrek izapide elektronikoak egin ahal izango dituzte beste udalerri batzuetara, esaterako Bilbora, joan beharrik gabe. Honi esker, erosotasuna eta irisgarritasuna nabarmen hobetzen dira.
Zerbitzu berri honen helburua herritarrei administrazio elektronikorako sarbidea erraztea, arrakala digitala murriztea eta funtsezko izapideen kudeaketan autonomia sustatzea da. Horrela, Durangok administrazio hurbilago, eraginkorrago eta inklusiboagoaren aldeko apustua sendotzen du, biztanleria osoaren beharretara egokitzen dena, bereziki adinekoen edo mugikortasun murriztua duten pertsonen beharretara.
Dokumentazioa Eguneratzeko Puntuak NAN elektronikoarekin lotutako hainbat izapide azkar eta modu seguruan egiteko aukera ematen du. Gailu honen bidez, herritarrek ziurtagiri digitalak berritu ditzakete (dokumentuak elektronikoki sinatzeko edo lineako zerbitzu publikoetara sartzeko beharrezkoak direnak), NANe-ko pasahitza modu seguruan aldatu, NAN digital berria aktibatu, izapide elektronikoak egiteko ezinbestekoa baita, eta dokumentuaren egoera eta baliozkotasuna egiaztatu, behar bezala funtzionatzen duela bermatzeko.
DNI digitalaren abantaila nagusietako bat da gehieneko izapideetarako NAN fisikoa ordezkatzen duela, eta herritarrek beren identitatea digitalki egiaztatu ahal izango dutela, NAN fisikoa eduki beharrik gabe. Horrenbestez, gailu honetatik, herritarrek beren mugikorrean NAN digitala instalatu ahal izango dute, eta dokumentu fisikoa eraman beharrik gabe egin ahal izango dituzte izapide elektronikoak, salbu eta aireportuetan, non oraindik NAN fisikoa beharko den kontrolguneetara sartzeko.
Poliziaren Zuzendaritza Nagusiak bultzatutako Nortasun Digitalaren Planaren baitan dago ekimen hau. Planaren helburua Estatuko zerbitzu digitaletarako sarbide segurua udalerri guztietara zabaltzea da. Ekimen honi esker, Durango eguneratze-puntuen sare nazional batean sartzen da, identitate digitalaren kudeaketa hurbilago, seguruago eta eraginkorrago egiteko.
Josune Escota, Durangoko Udaleko Antolaketa Batzorde buruak azpimarratu duenez: “NAN elektronikoa eguneratzeko puntu hau abian jartzea administrazio modernoago, irisgarriago eta eraginkorrago baterako beste urrats bat da. Gure konpromisoa da teknologia eta zerbitzu publikoak pertsona guztiengana hurbiltzen jarraitzea, funtsezko izapideak egitea gero eta errazagoa eta azkarragoa izan dadin.”
