Euskalmetek abisu horia ezarriko du gaur arratsaldean ekaitz arriskuagatik
EGURALDIA | Gaur, astelehena, lehen orduak argiak izan arren, eguna igaro ahala zerua gero eta hodeitsuago egongo da eta euria egin dezake. Horrela, Euskalmetek abisu horia ezarriko du gaur arratsaldetik, 15:00etatik, gauerdira, prezipitazio handiengatik eta ekaitzengatik.
Astearen zati handi bat egoera grisean egongo da, asteburura arteko aurreikuspenen arabera. Gainera, udazkeneko tenperaturak bere horretan mantenduko dira, eta maximoak 20 gradu ingurukoak izango dira datozen egunetan.
Eguraldia grisa izango da eta euria egingo du gaur, astelehena, GRAFISMOA: Unai García
Astelehena, hodeitsu arratsaldean
Asteleheneko lehen orduetan behe-lainoa sor daitekeen arren, ostarteak zabalak izango dira eta ez du euririk egingo. Egunak aurrera egin ahala hodeiak ugaritu egingo dira eta egunaren bigarren partean zerua oso hodeitsu egongo da, zaparrada trumoitsu batzuekin. Iparraldeko haizea ibiliko da goizetik aurrera, arratsalde-gau partean bolada gogorrekin, eta tenperaturak behera egingo du; zenbait tokitan egunak udazkeneko itxura hartuko du.
Asteartea, udazkena
Asteartean udazkeneko eguraldiarekin jarraituko dugu, gris eta fresko. Haizeak iparraldetik joko du eta tenperatura maximoek behera egingo dute berriro, puntu askotan 20 ºC-tik behera. Zerua estalita egongo da eta euria sarri egingo du; zaparradekin batera ekaitza ere bota dezake, batez ere egunaren lehen partean.
