Merkurioa 20 gradutik gora ibiliko da larunbatean eta igandean
EGURALDIA | Udaberriko eguraldia astebururako, ostarteak eta tenperatura epelak 20 graduren bueltan larunbatean eta igandean.
Ostirala, 20 gradutik gora
Ostiralean zerua tarteka hodeitsu egongo da. Kostaldean erdi mailako hodeiak eta goi-hodeiak izango dira nagusi eta euria egiteko aukera txikiagoa izango da. Barnealdean hodei trinkoagoak agertuko dira eta goizetik aurrera zaparradak botako ditu han-hemenka; arratsalde-gau partean mardulagoak izan daitezke eta ekaitzak jo dezake. Egunaren hasieran hego-ekialdeko haizea zakar ibiliko da, goiza aurrera joan ahala indarra galduz joango da. Tenperatura maximoak nabarmen igoko dira; Kantauri isurialdeko hainbat tokitan 20 ºC-tik gorakoak izango dira.
Zapatua, haizetsu
Larunbatean, hodeiak eta ostarteak. Goizean goiz izango dira zabalagoak ostarteak eta euria egiteko aukera txikiagoa izango da orduan. Arratsaldean zerua hodeitsuago egongo da eta zaparrada trumoitsu batzuk botako ditu ziurrenik. Egunaren hasieran hegoaldeko edo hego-mendebaldeko haizea ibiliko da; eguerdi aldera haizeak indarra galdu egingo du eta iparraldera aldatuko da. Tenperaturan aldaketa handirik ez; zenbait lekutan gutxi jaitsiko da.
