Juan Orobiogoitia institutuak lehen aldiz parte hartu du proiektu honetan
IURRETA | Gaurkoa egun berezia izan da IES Juan Orobiogoitia BHIn. Izan ere, Erasmus+ programaren baitan, Frantziako ikasle talde bati ongietorria egin diote Iurretako ikastetxeko ikasle eta irakasleek. “Juan Orobiogoitia Institutuan lehen aldiz parte hartzen ari gara Erasmus+ programa ospetsuan, hainbat herrialdetako ikasleen arteko kultura- eta hezkuntza-trukea sustatzen duen proiektu europarrean. Aurten, Frantziako bi instituturekin elkarlanean hasi gara, eta jasangarritasunean, kirolean eta metodologia aktiboetan oinarritutako programa garatzen ari gara “, azaldu dute zentroko arduradunek.
Ongietorri ekitaldian -Banangoa barne- Oskar Koka alkatea izan da, eta “hezkuntzak kultura ezberdinak batzeko duen garrantzia” azpimarratu du. Bestalde, Asier Astola zuzendariak adierazi duenez, “Erasmus+ programan parte hartzen dugun lehen urte honekin, aurrerapauso handia ematen ari gara internazionalizazioarekin eta hezkuntza berrikuntzarekin dugun konpromisoan. Gure ikasleak eta gure hezkuntza-komunitate osoa aberasten dituzten esperientzien aldeko apustua egiten dugu”.
Erasmus+
Programa honi esker, astero Iurretako institutuko ikasle talde batek proiektu honetan lan egiten du, bere prestakuntza akademikoan ardatz tematiko hauei buruzko ikaskuntzak txertatuz. “Ekimen honen barruan, joan den urtarrilean Frantziako Loira eskualdera joan ginen gure ikasleekin batera, Frantziako ikaskideekin esperientziak partekatzeko. Astebetez, hezkuntza eta kultura jarduera ezberdinetan parte hartu zuten, ingelesez eta frantsesez komunikatuz eta kultura berri batean murgilduz “, gogoratu dute.
Horrela, nazioarteko 18 ikasleak astebetez egongo dira herrian, eta elkarrekintza eta ikaskuntza bateratua sustatzeko diseinatutako jardueretan parte hartuko dute.
Zentzu horretan, IES Juan Orobiogoitia BHItik proiektu honen garrantzia azpimarratu dute eta “Erasmus+ programak gure ikasleentzako aukera paregabea eskaintzen digu. Ingeleseko eta frantseseko hizkuntza-gaitasunak hobetzeaz gain, beren etorkizunerako funtsezkoak diren gaitasunak garatzen ere laguntzen die, hala nola autonomia, egokitzeko gaitasuna eta talde-lana. Gainera, truke horrek herrialde parte-hartzaileen arteko kultura- eta hezkuntza-loturak indartzen ditu, Europako balioak sustatuz, hala nola lankidetza eta aniztasuna “.
