Otsailaren 21, 22 eta 23an Landako Guneak aukeren azokaren edizio berri bat hartuko du
DURANGO | Bihar, hilak 21, Dendak Bai Fest-en edizio berri bat abiatuko da Landako Gunean, hiru egunez (otsailaren 21, 22 eta 23an) eskaintza komertzial eta gastronomiko zabala bilduko duen erreferentziazko ekitaldia eta iraganeko Aukeren Azoka. Beste behin ere, jaialdiak produktu eta zerbitzu ugari bilduko ditu, besteak beste, haur eta helduen moda, kirol-arropa, lentzeria, lurrin-denda, ile- apaindegia, liburu-denda eta marketin eta publizitate zerbitzuak.
“Edizio berri honekin, Dendak Bai elkarteak tokiko merkataritza dinamizatzeko apustua berresten du, bisitari guztiei erosketen, gastronomiaren eta aisialdiaren esperientzia osoa eskainiz”, aurreratu dute Durangaldeko Merkatari eta Ostalari Elkartetik.
Zentzu horretan, gune gastroan, bertaratzen direnek bertako produktuez gozatu ahal izango dute, hala nola gildak, tortillak, gozokiak eta kafea, erosketen arteko atsedenaldi baterako edo lagunen edota familiaren arteko tarte baterako aproposak.
Esperientzia osatzeko, ekitaldiak hainbat jarduera izango ditu. Adibidez, otsailaren 22an, larunbata, 11:00etan, haurrentzako sukaldaritza tailerra izango da Gozatu Gozotegiaren eskutik. Ondoren, 12:30etan, Kids&Us-ek bere ipuin kontaketa egingo du ingelesez. Amaitzeko, 17:00etan, Sancho Tena lurrin-dendak jardunaldia usaimen bingo dibertigarri eta entretenigarriarekin alaituko du.
Berrikuntza gisa, otsailaren 21ean, ostirala, 19:00etan, Akustikovers bikoteak zuzeneko kontzertua eskainiko du, eta otsailaren 22an, larunbata, 19:00etan ere, DJ MiniAnn durangarra arduratuko da arratsaldea girotzeaz.
Bestalde, Txikipark-a ere izango du, haurrentzako jolas libreko gunea, Durangoko Udalarekin elkarlanean jarritakoa, eta ekitaldi osoan zehar ordutegi berean irekita egongo dena.
Ordutegia
Sarrera doakoa izango da, eta erosketak edo kontsumizioak egiten dituztenek bi ordu doan izango dituzte Landako Guneko aparkalekuan.
Ordutegiari dagokionez, ordu hauetan egongo da zabalik:
- Otsailak 21, ostirala: 10:00etatik 14:00etara eta 17:00etatik 21:00etara.
- Otsailak 22, larunbata: 10:00etatik 21:00etara.
- Otsailak 23, igandea: 11:00etatik 14:00etara.
Dendak Bai Fest 2025 ekimena Dendak Bai-k antolatu du, Durangoko Udalaren eta Eusko Jaurlaritzako Turismo, Merkataritza eta Kontsumo Sailaren laguntzarekin.
