DOT Durangaldea

94 6550 033   info@dot.eus

ZUZENEAN

Durangoko osoko bilkurak, aho batez, Donostiarako autobusaren linea hobetzea eskatu du

Udalaren helburua, aldundiekin eta Eusko Jaurlaritzarekin lankidetzan, garraio publikoko sare «eraginkor eta herritarren beharretara egokitua» sortzea da.

Busa hobetzeko eskaera aho batez onartu da
Busa hobetzeko eskaera aho batez onartu da

DURANGO| Durangoko Udalak EH Bilduk aurkeztutako mozioa eztabaidatu du gaur arratsaldean, Durango eta Donostia arteko autobus zerbitzuaren hobekuntzari buruz. Idatzi hori gainerako alderdiekin adostu da, eta, azkenean, udalbatzaren aho bateko babesa jaso du.

Gobernu-taldeak azaldu duenez, durangarrentzako konektibitatea eta mugikortasuna hobetzeko eta Durango eta Donostia lotzen dituen autobus-linearen maiztasunak optimizatzeko lanean ari dira, eta, horretarako, «ezinbestekoa da garraioaren arloan eskumena duten foru-aldundien eta Eusko Jaurlaritzaren inplikazioa».

Udalak, aldundiekin eta Eusko Jaurlaritzarekin elkarlanean, Durangoko herritarren beharretara egokitutako garraio publikoko sare eraginkor bat sortu nahi du. Horretarako, hainbat urrats eman dira legegintzaldia hasi zenetik.

EAJk eta PSEk azaldu dutenez, 2024ko urtarrilean Durango-Donostia autobus linearen maiztasuna handitzeari buruz herritarrek egindako hainbat eskaerari erantzun zitzaien. Gipuzkoako Foru Aldundiari gutun bat bidali zitzaion eskari horri aurre egiteko. Gainera, posta elektronikoz bidali ziren gai horri buruz azken bi urteetan jasotako 17 eskaera eta iradokizun islatzen dituzten datuak, bai eta eska litezkeen maiztasunak ere.

2024ko urtarrilaren 25ean, udal gobernu taldeak bilera bat egin zuen Bizkaiko Foru Aldundiko Garraio Sailarekin hobekuntza horiek eztabaidatzeko. Aurrerago, otsailaren 14an, idazki formal bat bidali zitzaion Bizkaiko Foru Aldundiari, hobetzeko eskaera horiek Gipuzkoako Foru Aldundiari helarazteko laguntza eskatuz. Idazki horretan, ildo horren eskari potentziala aztertzeko konpromisoaren berri ere eman zen.

Informazio gehiago jasotzeko, ekainaren 10ean idazki bat bidali zitzaion Euskal Herriko Unibertsitateko (EHU) Errektoretzari, Donostiako Fakultatean matrikulatutako Durangoko ikasle-kopuruari buruzko datuak eskatzeko. Durangoko Udalak azpimarratu du EHUrekin harremanetan daudela eta informazio hori lehenbailehen jasotzea espero duela.

Utzi zure iruzkina

Zure e-posta helbidea ez da argitaratuko. Beharrezko eremuak * markatuta daude

Scroll to Top