Udalak aztertuko du Santa Anako loreontzien ordez neurri txikiagoko loreontziak jartzeko aukera, larrialdi-egoeretan Artekale eta Barrenkalerako sarbidea errazteko.
DURANGO | 2023ko azaroan, Iurreta, Markina-Xemein, Arratzu eta Zallako suhiltzaile-parkeetako errelebo guztiek etxebizitza-suteen maniobra errealista batzuk egin zituzten Durangoko alde zaharrean.
Hirigune historikoetako etxebizitza-suteak egoera bereziki konplexuak dira larrialdi-zerbitzuentzat, hainbat faktorek bat egiten dutelako: kamioiak sartzeko zailtasunak, ur-horniduraren mugak, ekipoekin maniobrak egiteko zailtasunak, etxebizitzen eta eraikinen artean hedatzeko arrisku handiagoa eraikin zaharrak pilatzeagatik, etab. Horregatik, erantzun eraginkorra ematea funtsezkoa da hasiera-hasieratik.
Entrenamendu horiek udalen laguntzarekin diseinatu dira, besteak beste, Durangokoarekin, eta suteen aurkako segurtasunaren lehentasunezko alderdiak praktikan jartzea ahalbidetu dute, hala nola, ibilgailu astunekin sartzea eta kokatzea, autoeskailerak kokatzea, espazio konplexuetan hidraulika jartzea edo eskuzko eskailerak dituzten erreskateak egitea, besteak beste. Maniobretan lortutako datuekin, entrenamenduaz gain, Foru Aldundiko Prebentzio, Su Itzaltze eta Salbamendu Zerbitzuko agintariek eta Bizkaia Prest larrialdiak kudeatzeko zentroak, benetako larrialdietan, erabaki arinak hartzeko duten informazioa hobetu da.
Sartzeko zailtasuna
Udalerrian egindako maniobrak aztertu ondoren, hobetu beharreko eremuak identifikatu dituzte Suhiltzaileen Foru Zerbitzuak eta Durangoko Udalak.
Artekale eta Barrenkale kaleetara Santa Ana plazatik sartzea zaila dela ikusi da, inguruko jardinerak astunak direlako. Konponbide gisa, Udalak aztertuko du loreontzi horren ordez neurri txikiagoko bat jartzeko aukera, larrialdi-egoeretan sarbidea errazteko.
Gainera, eremuko ur-azpiegiturei buruzko informazioa eguneratzea aurreikusten da, Suhiltzaileen Foru Zerbitzuaren esku hartzeko laguntza-sisteman txertatzeko.
Bi aldeek adierazi dute elkarlan estua egin nahi dutela aldian behin maniobrak egiteko, koordinazio eraginkorra izateko eta udalerriko segurtasuna hobetzeko. Ahalegin horiek Bulego Teknikoko arduradunekin eta Udaltzaingoarekin koordinatuko dira.
Durangoko Udalak ziurtatu du ekintza zehatzak hasi direla identifikatutako hobekuntza-arloei ekiteko, «horrela, egungo egoera hobetzeko eta ingurune segurua bermatzeko dedikazioa erakutsiz».
