88. urteurrena oroitzeko hainbat jarduera antolatu dira
DURANGO | Datorren martxoaren 31n, 88 urte beteko dira Durango suntsitu zuen bonbardaketatik, armada frankistaren eskutik. Egun tragiko hartan, 213 pertsona hil ziren, asko goizeko erlijio-zerbitzuetan zeudela. Urteak igaro arren, herriak oraindik bizirik mantentzen du gertaera honen oroimena, eta urtero omenaldia egiten die biktima guztiei, memoria historikoaren garrantziaz hausnartuz.
“1937ko martxoaren 31n, Durango armada frankistak modu indiskriminatuan bonbardatu zuen. Urte askotan, bonbardaketa hau isilarazia izan zen, beldurragatik eta batzuek egia ezkutatzeko zuten interesagatik. Baina durangarrok ez dugu ahaztu nahi, ezta ahaztuko ere. Lehenik eta behin, biktimentzat, merezi duten aitortza jasotzeko. Eta bigarrenik, belaunaldi berrientzat, gure herriak jasan zuen sufrimendua ezagutu dezaten eta errepikatu behar ez diren akatsak argi izan ditzaten. Zoritxarrez, gizateriak ez du iraganetik ikasi, Gazan edo Ukrainan gertatzen ari diren gatazkek erakusten duten bezala. Programa hau gure ekarpena da bakearen alde”, nabarmendu zuen Mireia Elkoroiribe alkateak, bonbardaketaren urteurrena ospatzeko programazioa aurkezteko ekitaldian.
Aurten, Durangoko Udalak, bertako hainbat elkarteekin elkarlanean, hala nola Gerediaga, Kriskitin dantza-taldea, Astarloa Kultur Elkartea, Suargi eta Gogora Institutua eta Eusko Jaurlaritzaren babesarekin, egitarau berezia antolatu du 1937ko gertakariak gogoratzeko. Ekintzen artean honako hauek nabarmenduko dira: bonbardaketaren toki historikoetan bisita gidatuak, Saibigainen aurkitutako elementuen erakusketak eta memoria historikoari buruzko hitzaldiak, baita gerran emakumeek izan zuten rolari buruzko saioak ere.
Gainera, iaz berreskuratu ondoren, martxoaren 31ko ekitaldi instituzionala mantenduko da memoria eta omenaldi gisa, Durangoko eta Gernikako biktimek parte hartuko dutelarik lore-eskaintza tradizionala eginez.
Egitarau guztia hemen
