Udalak diplomak eta opariak banatu dizkie Nafarroa Zentroko adin handieneko pertsonei, haien bizi-ibilbidea eta udalerriari egindako ekarpena aitortzeko
AMOREBIETA-ETXANO | Adinekoen Nazioarteko Eguna dela eta, Amorebieta-Etxanoko Udalak aitortza-ekitaldia egin du aste honetan, urriaren 1ean, Nafarroa Zentroan. Bertan, udalerriko adin handieneko pertsonei omenaldia egin zaie, Nafarroa Zentroarekin, Nagusi Aretoarekin eta jubilatuen elkarteekin lotura duten pertsonei, hain zuzen ere. Jardunaldiak Ainhoa Salterain Gandarias alkatearen parte-hartzea izan du, eta bertan pertsona horien bizi-ibilbidea, komunitateari egindako ekarpena eta Amorebieta-Etxanoko gizarte-bizitzan duten parte-hartze aktiboa nabarmendu dira.
Ekitaldia Nafarroa Zentroko kafetegian izan zen, eta bertan diplomak eta opari txikiak banatu zaizkie omendutako pertsonei, urteetan zehar egindako ibilbideagatik, ahaleginagatik eta udalerriari egindako ekarpenagatik eskerrak emateko. Topaketak giro hurbil eta emozionala izan du, Amorebieta-Etxanoren azken hamarkadetako historiaren parte izan diren pertsonak aitortzeko.
Ainhoa Salterain Gandarias alkateak adineko pertsonak protagonista izango diren guneak sortzen jarraitzearen garrantzia azpimarratu du: “Adineko pertsonak Amorebieta-Etxanoren funtsezko parte dira. Haien esperientziak, ezagutzak eta udalerriari egindako zein egiten jarraitzen duten ekarpenak balio handia dute. Udaletik haiekin batera jarraitu nahi dugu, haien beharrak entzunez eta topaketa zein parte-hartzerako guneak sustatuz”.
Era berean, alkateak Nafarroa Zentroak eta Nagusi Aretoak adinekoen zahartze aktiboa sustatzeko duten garrantzia nabarmendu du: “Gure adinekoek gozatzen, ikasten eta harremanak sortzen jarrai dezaten nahi dugu. Urtero antolatzen diren jarduerek helburu hori dute: aktibo mantentzeko, elkarrekin egoteko eta udalerriko bizitzaren parte izaten jarraitzeko aukerak eskaintzea”.
Adinekoentzako jarduera denboraldi berriaren hasiera
Adinekoen Nazioarteko Eguneko ospakizunak bat egin du, gainera, udalerriko adinekoentzako jarduera eta tailerren denboraldi berriaren hasierarekin. Programazioak gimnasia, ibilaldiak, sevillanak eta ongizate fisikoa, soziala eta emozionala sustatzeko hainbat tailer jasotzen ditu.
Nagusi Aretoa, Zelaieta Zentroa eta Jubilatuen Elkartearen programazio berriak harrera bikaina izan du herritarren artean. Guztira, ia 700 lagunek eman dute izena aurreikusitako 40 jarduera baino gehiagotan parte hartzeko. Kopuru horrek erakusten du Amorebieta-Etxanoko adineko pertsonek aktibo jarraitzeko eta komunitateko ekimenetan parte hartzeko duten interesa.
Urtero bezala, Udalak adineko pertsonekiko konpromisoa indartzen jarraitzen du, parte-hartzea, autonomia eta harreman sozialak sustatzen dituzten programen bidez. Horren helburua da topaguneak eskaintzea, bizi-kalitatea hobetzen laguntzea eta udalerriko gizarte-sarea sendotzea.
