Yolanda Roji barakaldarrak bere ondarearen zati bat Udalari utzi zion txakurren eta katuen ongizatea hobetzeko
BARAKALDO | Udala datozen asteetan hasiko da katuentzako babesleku bat sortzen, kaleko katuen koloniak lekualdatzea eta aldi baterako egotea errazteko berariaz egokitutako gune bat, hainbat arrazoi direla medio, hiriko kaleetan ohiko kokapena utzi behar dutenak. Jarduketari esker, esparru seguru bat eduki ahal izango da animaliak lekualdatzeko, animaliak dauden ingurunean esku hartu behar denean; adibidez, obrak, urbanizazio-lanak edo leku horretan geratzea bateraezina egiten duten beste jarduketa batzuk direla eta. Honen bitartez, Yolanda Roji González Barakaldoko bizilagunaren nahia gauzatu ahal izango da. Barakaldoko bizilagunak animalien maitalea zen, eta bere jaraunspena Udalari utzi zion katuentzako parke bat eta txakurrentzako beste bat abian jar zitzan.
Proiektua Lagunak Elkarte Animalistaren laguntzarekin egin da. Elkarte hori Barakaldoko kaleko animalien edo animalia abandonatuen etxe eta zaintza bila dabiltzan boluntarioek osatzen dute. Horrela, behin hori egin ondoren, udal espazio bat egongo da, katuen egoerei erantzuteko eta behar den denboran baldintza egokiak bermatzeko prestatua. Obra dagoeneko kontratatu da eta 47.735 euroko inbertsioa aurreikusten du, bi hilabeteko egikaritze-epearekin.
Egokitutako esparrua
Proiektuak udal lurzati bat egokitzea aurreikusten du. Lurzati horren kokapena ez da argituko, hain zuzen ere, animalien ongizatea bermatzeko. Lanak hasteko, lurra garbitu eta belar-sastrakak kenduko dira. Ondoren, egurrezko egitura bat jarriko da, zutabez eta habez osatua, eta, horri esker, esparru itxi bat sortu ahal izango da, alboetan nahiz estalkian sare metalikozko hesi baten bidez babestuta. Halaber, ateak eta panelak jarriko dira itxitako eremua egokitzeko, eta, gainera, beharrezko kanalizazioak egingo dira espazioa argiteriaz hornitzeko.
Lagunak elkarteak eskerrak eman nahi izan dizkio Yolanda Rojiri “ahotsik ez dutenak gogoan izateagatik”.
