Herriaren Eskubideak ohartarazi du Durangoko aire-kalitateko estazioak ez dituela artsenikoa eta beruna neurtzen
DURANGO | Osasun eta segurtasun krisi larria eztandatu da Durangoko Montetorreta inguruko munizio enpresa batean. dot-ek jakin ahal izan duenez, lantegiko hogeita hamar langileetatik hamar baja hartuta daude momentu honetan, odolean eta orinean artseniko maila altuak eman ondoren. Kasurik kezkagarriena labeetako arduradun batena da: Usansoloko ospitalean dago ingressatuta, oso egoera larrian, birika-gaitasunaren % 10arekin bakarrik.
Egoeraren larritasunaren aurrean, joan den astelehenean salaketa penala aurkeztu zen bide judizialetik. Langileen arabera, enpresan legez baimendutako artseniko kontzentrazioak bost bider biderkatu dira. Mediku-txostenek datu beldurgarriak erakusten dituzte: orineko artseniko maila normala 35 mikrogramokoa den bitartean, 68,5 eta 68,8ko neurketak eman dira, eta une batzuetan 480ko gailurretara iritsi dira.
Kaltetuek salatu dutenez, lantegiko aspirazio-sistemak ez du behar bezala funtzionatzen, eta horrek beruna eta artsenikoa metatzea eragiten du. Gainera, substantzia horiek manipulatzeko jarraibide-libururik ez dutela eta egunerokoan FFP3 maskarak ez zaizkiela ematen adierazi dute. ELA, LAB eta CCOO sindikatuak prozeduran pertsonatu dira eta zuzendaritzari datuak ezkutatzea leporatu diote. Osalan enpresan esku hartzekoa da gaur eta bihar artean.
Bestalde, Herriaren Eskubidea/Independientes taldeak gogor kritikatu du Durangoko Udal Gobernuaren (EAJ eta PSE) jarrera. Udalak airearen kalitatea ona dela esan duen arren, plataforma independenteak gogorarazi du Durangoko aire-estazioak ez duela ez artsenikorik ez berunik neurtzen.
“Bencenoarekin gertatu bezala, EAJk eta PSEk airearen kalitatea ona dela diote, horri buruzko daturik izan gabe”, salatu dute. Gainera, gogorarazi dute Eusko Legebiltzarrak 2018an onartu zuela kutsadura-pasarteei aurre egiteko protokoloak sortzea, baina hamar urte geroago Ingurumen eta Osasun sailek ez dutela agindua bete.
Enpresak jakinarazi du ohar bat argitaratuko duela gaur goizean egoerari buruzko azalpenak emateko.
