Bilbotar gazteak beste bi denboraldiz luzatu du kontratua, eta beste bat aukerakoa izango da
EUP! | Athletic Clubek eta 21 urteko Ane Elexpuruk akordioa sinatu dute harrobiko mailetako Munduko eta Europako txapeldunaren kontratua bi denboraldiz luzatzeko, 2027ko ekainaren 30era arte, 2028ra arte luzatzeko aukerarekin.
Eskuin hegaleko atzelariak errendimendu bikaina erakutsi du, Liga F-n finkatu eta David Aznar egungo entrenatzailearentzat funtsezko jokalaria bilakatu arte. Denboraldi honetan Ligan 18 aldiz parte hartu du hasierako hamaikakoan, 1.500 minutu baino gehiago pilatu dituelarik. Gainera, bi gol sartu ditu. Jon Uriarte presidentea eta Xabier Arrieta Emakumezkoen Futboleko zuzendaria izan dira Ibaiganen egin den sinadura-ekitaldian.
Atzelaria kadete mailan iritsi zen Lezamara Bizkerre FT taldetik 2018-19 denboraldian, bere jaioterriko Loiola Indautxu bilbotarretik igaro ondoren. Lehoi gisa 2022ko urriaren 2an egin zuen debuta, Real Madriden aurka, Lezaman, titular gisa, eta bigarren taldearen eta lehen taldearen arteko parte-hartzea txandakatu zuelarik. 2023-24 denboralditik, lehen taldearen fitxa dauka, eta, bere adina gorabehera, plantilan minutu gehien dituen laugarren futbolaria da. Jokalari finkoa da eskuin hegalean, eta sakontasun handia ematen dio taldeari.
