Gorka Morenoren taldea lider nabarmenari irabazten lehenak izatetik oso gertu egon da
FUTBOLA | Futbola ez da justua izan urdinekin, Cultural Leonesa taldearen aurka sari handiagoa merezi izan baitute. Gorka Morenoren taldea liderrari irabazten lehenak izatetik oso gertu egon da, baina garaipenak 89. minutuan ihes egin du. Ordura arte, SDA nagusi izan da eta abagune ugari izan ditu. Atsedenaldira iritsi aurretik Herviasek egindako penaltia bakarrik sartu da, neurri handi batean Bañuz atezain bisitariaren geldiketa onak direla eta.
Zornotzarrak ondo sartu dira partidan, serio eta txukun. Partidako lehen abisua zornotzarra izan da. Carbonellek jaurtiketa gogorra egin du area ertzetik eta Bañuz luzatu behar izan du 18. minutuan 1-0ekoa saihesteko. Cultural Leonesa taldeak erantzun du Victor Garciaren bitartez, gurutzatuegi atera den jaurtiketa batekin. Gorka Morenoren gizonek aurkariaren area bilatzen jarraitu dute. Carbonell gol ikusgarria sartzeko zorian izan da 30. minutuan. Kontrario batzuk atzean utzita, ezin izan du Bañuz gainditu. Camachok, lesioaren ondorioz itzuli denean, ezkerretik abiatu du motorra, eta arean jarri da, beste arrisku ekintza bat sortuz. 42.ean Ben Hamed izan da area kanpotik gol baten bila ibili dena. Berriro Bañuzek hegan egin du saihesteko. Zornotzar temak saria lortu du. Epaileak eskuz egindako penaltia adierazi du Bertoren erdiraketa baten ostean eta Herviasek ez du barkatu 11 metroetatik SDAri merezitako abantaila emateko.
Bigarren zatia hasi eta berehala, Hervias area barrura sartu da bigarrenaren bila, baina Bañuzen beste geldiketa on batekin egin du topo. Cultural Leonesak aurrerapausoa eman du berdinketaren bila. Gureak sendo zeuden aukerarik ez emateko. Carbonellek Bañuzen beste esku handi bat aurkitu du 67. minutuan kontraeraso on batean. Marin ere saiatu da zartako batekin, gora joan den areako tontorretik. Carbonell nonahiko jokalaria ere golaren inguruan ibili da, azken txanpan sartuta. Futbolak ez ditu merezimenduak ulertzen eta, gaur, berriz ere agerian geratu da. 89.ean, kanpokoek berdinketa lortu dute Rodri Suarezen burukada batekin korner baten irteeran. Luzapen denboran, urdinek sufritzen jakin dute, gora etorri den liderraren aurka puntua lotzeko.
