Interesatuek izena eman behar dute Zelaieta Zentroan edo udalaren webguneko “Izen emateak” atalean.
AMOREBIETA-ETXANO | Udal zornotzarrak bihar irekiko du jaietako marmitako lehiaketan izena emateko epea. Ekitaldia uztailaren 20an izango da eta herriko hainbat gunetan ospatuko da.
Zelaieta Zentroan aldez aurretik izena ematen duten taldeek parte hartu ahal izango dute lehiaketan. Izen-ematea astelehenetik ostiralera egin daiteke, 8: 30etatik 21:30etara, bihartik uztailaren 10eko 13:00ak arte, asteazkena. Halaber, udalaren webguneko “Izen emateak” atalaren bidez ere eman ahal izango da izena.
Izena eman duten mahaikideen kopurua eta banatutako mahai eta aulkien kopurua ahalik eta gehien doitzeko, eta, horrela, lehiaketak behar bezala funtzionatzen duela bermatzeko, talde bakoitzeko kide batek Ametx txartela eduki eta aurkeztu beharko du. Pertsona hori izango da Udalak utzitako materialaren arduraduna, eta jaso gabeko, itzuli gabeko edo kaltetutako materialari dagokion zenbatekoa ordaindu beharko du, honako zenbateko hauen arabera: mahaiak 30 euro (unitateko prezioa), aulkiak 20 euro (unitateko prezioa) eta 50 euro beste edozein zehapen motagatik. Zehapenak kobratzeko arrazoiak honako hauek izango dira: banatutako mahai eta aulkien eta benetako mahaikideen kopuruaren arteko desoreka nabarmena; banatutako materiala (mahaiak eta aulkiak) antolatzaileek adierazitako ordutegi-marjinean eta lekuan ez ematea edo baldintza txarretan entregatzea; erakundeak ezarritako espazio-banaketa ez errespetatzea, eta lehiaketaren oinarrietan jasota ez dagoen eta erakundeak estimatzen duen beste edozein arrazoi.
Espazioen zozketa
Lehiaketan parte hartuko duten koadrilek bete beharreko tokiak zozketa publiko batean zozketatuko dira, Zelaietako Auditorioan, uztailaren 17an, 12:00etan. Leku horiek kide kopuruaren arabera markatu eta sailkatuko dira, eta kategorien arabera zozketatuko dira: A (talde txikiak), B (talde handiak) eta C (challengeko taldeak). Talde bakoitzak nahitaez bete beharko du zozketa bidez esleitutako lursaila.
Antolatzaileek hegaluzea, mahai-tresnak eta ogia baino ez diete emango lehiaketan parte hartzen duten gazte taldeei. Mahaiak eta aulkiak mapan adierazitako lekuetan emango dira, 10:30etik 13:00etara, eta 13:00etatik 19:30era jasoko dira. Taldeek une oro bete beharko dituzte erakundearen jarraibideak. Sari banaketa 14:30etik 15:00etara egingo da Zubiondo plazan. Marmitako lehiaketan sortzen den edozein arazo konpontzeko, Batzorde Antolatzaile bat izendatuko da. Batzorde hori ekitaldia antolatzen duen taldeko bi kidek eta Amorebieta-Etxanoko Udaleko bi kidek osatuko dute.
