Udalak merkataritza-establezimenduei eta herritarren kontsumo-ohiturei buruzko azterketa egingo du
ABADIÑO | Udalak tokiko merkataritzaren egungo egoera eta herritarren kontsumo-ohiturak ezagutzeko azterketa integrala jarri du abian. Ekimenaren helburua sektorearen beharrak identifikatzea eta udalerriko jarduera ekonomikoa indartzeko neurriak zehaztea da.
Azterketak Abadiñoko merkataritza-sarearen erradiografia osatuko du, haren indarguneak, beharrak eta hobetzeko aukerak identifikatuz. Era berean, herritarren erosketa-ohiturak eta kontsumo-erabakietan eragina duten faktoreak aztertuko ditu.
Parte-hartzea
Proiektua partaidetza-prozesu baten bidez garatuko da, merkataritza-establezimenduen eta herritarren iritziak eta proposamenak jasotzeko. Horretarako, inkestak, elkarrizketak eta parte hartzeko hainbat gune antolatuko dituzte, inplikatutako eragileen beharrak eta eskaerak zuzenean ezagutzeko.
Diagnostikoaren emaitzak oinarri hartuta, Udalak ekintza-plan bat landuko du. Plan horrek datozen urteetan tokiko merkataritza sustatu eta sendotzeko lehentasunak eta neurriak zehaztuko ditu.
Besteak beste, establezimenduen lehiakortasuna indartzea, kontsumo-ohitura berrietara egokitzeko gaitasuna hobetzea eta merkataritza-eredu erakargarri, hurbil eta jasangarria sustatzea izango dira ekimenaren helburuak.
Udalak nabarmendu du tokiko merkataritzak funtsezko eginkizuna duela Abadiñoko eguneroko bizitzan, ez bakarrik ekonomiari egiten dion ekarpenagatik, baita gizarte-funtzioagatik eta auzoak zein espazio publikoak dinamizatzeko duen gaitasunagatik ere.
Horregatik, Udalak merkatariei, ostalariei eta herritarrei azterketan aktiboki parte hartzeko deia egin die. Haien ekarpenak funtsezkoak izango dira etorkizuneko jarduerak zehazteko eta Abadiñoko benetako beharrei erantzungo dien merkataritza-eredua elkarrekin eraikitzeko.
