Internet bidez administrazioarekin izapideak egiteko, norberaren identitatea egiaztatzeko eta dokumentuak elektronikoki sinatzeko balio duen ziurtagiria
AMOREBIETA-ETXANO | Amorebieta-Etxanoko Udalak zerbitzu berri bat jarri du abian Herritarrentzako Arreta Zerbitzuan (HAZ), herritarrei Diruaren eta Zerga-zigiluaren Fabrika Nazionalak (FNMT-CERES) pertsona fisikoentzat jaulkitzen duen ziurtagiri digitala eskuratzea errazteko.
Orain arte, Izenperen BAKQ identifikazio elektronikorako sistema eskatu ahal zen HAZen. Hemendik aurrera, zornotzarrek FNMT-CERES ziurtagiria eskuratzeko beharrezkoa den nortasun-egiaztapena ere egin ahal izango dute udal-bulegoetan.
Nortasuna aurrez aurre egiaztatzea FNMTk ziurtagiri digitala jaulkitzeko beharrezko urratsetako bat da. Zerbitzu berriari esker, herritarrek Amorebieta-Etxanon bertan egin ahal izango dute izapide hori, beste udalerri edo erakunde batzuetara joan beharrik gabe.
Ziurtagiri digitalak Internet bidez modu seguruan identifikatzeko eta administrazioekin hainbat izapide elektronikoki egiteko aukera ematen du.
Besteak beste, eskaerak aurkezteko, espedienteak kontsultatzeko edo jakinarazpenak jasotzeko aukera ematen du, eguneko 24 orduetan. Era berean, dokumentuak eta inprimakiak elektronikoki sinatzeko aukera ematen du, lege-balio osoz, eta hainbat erakunderen zerbitzu elektronikoetara sartzeko ere balio du, hala nola Zerga Agentziaren, Gizarte Segurantzaren, Osakidetzaren, Lanbideren edo Eusko Jaurlaritzaren zerbitzuetara.
Zerbitzu berri honekin, Udalak herritarren arreta eta administrazio elektronikoa hobetzen jarraitzen du, izapideak erraztuz eta joan-etorriak nahiz itxaronaldiak murriztuz.
Nola eskatu behar da?
Ziurtagiria eskuratzeko, interesdunak lehenik FNMT-CERESen webgunean hasi beharko du izapidea, pertsona fisikoentzako ziurtagiriaren eta aurrez aurreko egiaztapenaren atalean.
Lehen urrats hori egin ondoren, Amorebieta-Etxanoko Udaleko Herritarrentzako Arreta Zerbitzura (HAZ) joan beharko du pertsonalki, nortasuna egiaztatzeko. Egiaztapena egin ondoren, FNMTk ezarritako prozedurarekin jarraitu ahal izango du ziurtagiri digitala eskuratzeko.
