Egitarauak erakusketa bat, bidezko merkataritzako txokolate-dastaketa bat, dokumental-forum bat eta sentsibilizazio-jarduerak jasotzen ditu
AMOREBIETA-ETXANO | Amorebieta-Etxanok irailaren 28tik urriaren 4ra ospatuko du “Munduan Jirabiran – Lankidetzaren Astea” ekimenaren hirugarren edizioa. Udalak bultzatutako ekimen honen helburua da herritarrengana hurbiltzea lankidetzaren, elkartasunaren eta justizia sozialaren garrantzia.
Lehenengo bi edizioetan udalerrian dauden lankidetza-erakundeen lana ezagutaraztea eta tokiko lankidetzaren etorkizuneko erronkei buruz hausnartzea izan ziren ardatz nagusiak. 2026ko edizioak, aldiz, gure kontsumo-ohituretan eta horiek nazioarteko lankidetzarekin duten harremanean jarriko du arreta.
Lankidetzaren Asteak aurten kontsumitzeko dugun moduari buruz hausnartzeko aukera eskainiko du, bereziki ehungintzaren sektoreari erreparatuta, eta gure eguneroko erabakiek munduko beste leku batzuetan duten eraginari buruz. Ekimenaren bidez, kontsumo arduratsuaren garrantzia nabarmendu nahi da, baita berrerabiltzea, konpontzea eta birziklatzea bezalako ekintzak sustatu ere, gure ingurunearekin harreman jasangarriagoa eta bidezkoagoa eraikitzeko.
Sonia Cabezas Gizarte Ekintzako zinegotziak azaldu duenez, “lankidetza ez da soilik beste herrialde batzuetan egiten diren garapen-proiektuetara mugatzen; gure eguneroko praktikei begiratzera ere gonbidatzen gaitu, eta gure kontsumo-ereduaren eta beste pertsona batzuen errealitateen artean dagoen harremana ulertzera”.
“Aste honek aukera eskaintzen digu informatzeko, hausnartzeko eta mundu bidezkoago baten alde lan egiten duten ekimenak ezagutzeko. Gure eguneroko erabakiek ere eragina dute, eta garrantzitsua da horren jakitun izatea”, gehitu du zinegotziak.
Publiko guztientzako
Egitaraua Udalaren babesa duten lankidetza-proiektuei eta erakundeei buruzko erakusketa batekin hasiko da. Erakusketa hori irailaren 28tik urriaren 4ra Zelaietako erakusketa aretoan bisitatu ahal izango da. Bertan parte hartuko dute, besteak beste, Amanecer Solidario (ASOL), Derandein, EDUCAS, Euskal Fondoa, Kidenda, Munduaz Blai eta UNRWA erakundeek.
Gainera, liburutegiak irailaren 30era arte irakurketa-gune bat izango du Berbalapiko ekimenaren barruan, edizio honetako gaiarekin lotutako argitalpenen aukeraketa batekin.
Programatutako jardueren artean nabarmentzen da bidezko merkataritzako txokolate-dastaketa. Irailaren 30ean egingo da Zelaietan, 17:30etik 19:00etara, eta herritar guztientzat irekia izango da, aurrez izena emanda.
Urriaren 1ean, 17:00etatik 20:00etara, Zelaietak “Ropa sucia” dokumental-foruma hartuko du, SETEM Hego Haizearekin batera antolatuta. Proiekzioak moda azkarraren ondorioak eta ehungintzako industriako lan-baldintzak aztertzen ditu, eta amaieran solasaldi-gune bat izango da.
Egitaraua osatzeko, Kidenda eta Munduaz Blai erakundeen bidezko merkataritzako postuak, Gazte Txokon egingo den Mendebaldeko Saharari buruzko tailerra eta Derandeinen mendiko martxa eta pintxo-pote solidarioa izango dira. Azken hori urriaren 4an, 10:00etan, egingo da.
Munduan Jirabiran ekimenaren edizio berri honekin, Amorebieta-Etxanok lankidetzarekiko duen konpromisoa indartzen du, eta gure eguneroko erabakien eta mundu bidezkoago baten eraikuntzaren arteko harremanari buruz ezagutzeko, partekatzeko eta hausnartzeko gune bat sortzen du.
