Datorren ikasturteari begira maila ezberdinetako euskara ikastaroak eskainiko ditu modalitate desberdinetan
AMOREBIETA-ETXANO | Ikasturte berria ate joka dugun honetan, Zornotza Udal Euskaltegiak jada aurkeztu du 2026/2027 ikasturterako programazio berria. Prestakuntza urriaren 1etik ekainaren 28ra eskainiko da (autoikaskuntzarako urriaren 13tik ekainaren 16ra), eta maila guztietarako ikastaro presentzialak (A1, A2, B1, B2 eta C1) eskainiko dira, baita autoikaskuntza eta adinekoentzako, etorkinentzako (AISA) eta gurasoentzako ikastaro bereziak ere.
Aurrez aurreko ikastaroak taldeka emango dira goizez zein arratsaldez: 8 ordu astean A1, A2 eta B1 mailetan (astelehenetik ostegunera, 2 ordu egunean) eta 6 ordu astean B2 eta C1 mailetan (astelehen, asteazken eta ostegunetan, 2 ordu egunean). Autoikaskuntza modalitatea ere eskainiko da, astearte eta ostegunetan, urtean 190 ordurekin.
Izen-ematea eta epeak
- Aurrematrikula: Irailaren 1etik 23ra egongo da zabalik.
- Sarrera probak: Maila egiaztatu ezin dutenek sarrera proba egin beharko dute irailaren 22an edo 23an (goizeko 10:00etan edo arratsaldeko 16:00etan).
- Onartuen zerrendak: Irailaren 24an argitaratuko dira.
- Matrikulazioa: Irailaren 24an eta 25ean formalizatuko da.
Matrikula formalizatzeko, ikasleek abonu-agiria eta ikasle-fitxa aurkeztu beharko dituzte euskaltegiko idazkaritzan; epea irailaren 25ean amaituko da, 13:00etan. Taldeen ordutegia aukeratzeko izen-emate zenbakia hartuko da kontuan, eta behin matrikula eginda ez da ordaindutako zenbatekoa itzuliko.
Bonuak eta dirulaguntza bereziak
A1, A2 eta B1 mailak sustatzeko Euskara Bonua egongo da eskuragarri, eta ikastaroaren prezioa 120 €-koa soilik izango da. Bestalde, 16-18 urte bitartekoentzat C1 mailak dirulaguntza berezia izango du (120 €), eta langabetuek 10 €-ren truke ikasi ahal izango dute.
Informazio zehatza eta formularioak udal webgunean edo euskaltegiko bulegoetan (San Pedro, 5) daude eskuragarri, 09:00etatik 13:00etara eta 15:00etatik 18:00etara.
Informazio gehiagorako:
