Durangoko Udalak eta Eusko Jaurlaritzak Alokabideren bidez sinatutako hitzarmenaren esparruan esleitzen dira etxebizitza horiek. Alokabidek alokairuko babes sozialeko 16 etxebizitza kudeatzen ditu, udalerrian etxebizitza eskuragarrien eskaintza handitzeko helburuarekin.

Etxebizitzak Undatorre kaleko 8. zenbakian eta Jesús María Pedrosa kaleko 7. zenbakian daude, eta logela bat edo bi dituzte, 41-63 m²-ko azalerarekin eta 2-4 pertsonarentzako edukierarekin. Batzuek, gainera , trasteleku edo aparkalekuko plaza lotua dute.

Etxebizitzak ohiko bizileku iraunkor gisa erabili beharko dira, eta nahitaezkoa izango da horietan erroldatzea. Ezingo dira bigarren bizileku gisa erabili ezta hirugarrenei laga edo alokatu ere, Udalaren berariazko baimenik gabe.

Baldintzak eta hartzaileak

Adinez nagusi diren pertsonek edo ezkontza, bikote edo familia-lotura bidez elkartutako bi pertsonak edo gehiagok osatutako bizikidetza-unitateek eskuratu ahal izango dituzte etxebizitza horiek. Ezkontzen edo izatezko bikoteen kasuan, bi pertsonek agertu beharko dute kontratuaren titular gisa. Ez dira onartuko elkarrekin bizitzeko banakako bi eskaera.

Eskatzaileek betebehar hauek izango dituzte:

  • Jabetzan, gozamenean edo azalera-eskubidean etxebizitzarik ez edukitzea.
  • Azken 8 urteetan gutxienez 2 urtez Durangon erroldatuta egon izana.
  • Eusko Jaurlaritzaren Etxebizitza Babestuen Eskatzaileen Erregistroan izena emanda izatea, alokairuko modalitatean.
  • Udalarekin zorrik ez izatea.

Diru-sarrerei dagokienez, 9.000 eta 46.463,29 euro arteko mugak ezarri dira, etxebizitzaren tamainaren eta bizikidetza-unitatearen arabera.

Aurkezteko epea eta modua

Eskaerak otsailaren 10etik martxoaren 9ra bitartean aurkeztu ahal izango dira (biak barne). Eskabideak honela aurkeztu ahal izango dira:

  • www.durango.eus udal webgunearen bidez.
  • Herritarrentzako Arreta Zerbitzuan (HAZ).
  • Correosen eta gaitutako gainerako administrazioetan.

Esleitzeko irizpideak

Eskaerak baremazio bidez baloratuko dira, honako alderdi hauek kontuan hartuta: diru-sarrerak, bizikideen kopurua, premia berezia duten kolektiboetako kide izatea (genero-indarkeriaren biktimak, desgaitasuna duten pertsonak, guraso bakarreko familiak edo 4 kide arteko familia ugariak, eta beste kolektibo kaltebera batzuk), eta Eskatzaileen Erregistroko antzinatasuna.

Etxebizitzak talde hauen arabera esleituko dira:

  • 8 etxebizitza 35 urtetik beherako gazteentzat
  • 2 etxebizitza desgaitasuna duten pertsonentzat (egokitu gabeak)
  • 2 etxebizitza 70 urtetik gorakoentzat
  • 2 etxebizitza guraso bakarreko familientzat
  • 2 etxebizitza genero-indarkeriaren biktimentzat

Talde batean esleitu ez diren etxebizitzak eskaera gehien dituztenei berresleituko zaizkie.
Esleipendunek urtebeteko alokairu-kontratua sinatuko dute, gehienez 5 urtez luzatu daitekeena. Alokairuaren zenbatekoak ezin izango du kontratuaren titularren urteko diru-sarrera haztatuen %30 gainditu.

Oinarriak, eskatutako dokumentazioa eta inprimakiak www.durango.eus webgunean daude eskuragarri.