Urtia faseak 36 hilabeteko egikaritze-epea eta 20,7 milioi euroko aurrekontua ditu
AMOREBIETA-ETXANO | Carlos Alzagak, Bizkaiko Foru Aldundiko Azpiegituretarako eta Lurralde Garapenerako diputatuak, Ermuko Saihesbidearen I-Urtia fasearen xehetasunak aurkeztu ditu astelehen honetan prentsaurrekoan. Bide-azpiegitura berri honek hiriguneko zirkulazio-baldintzak hobetuko ditu eta udalerriko industrialdeekiko lotura indartuko du.
Carlos Alzagak azaldu duen bezala dokumentua Aldundiaren hurrengo Gobernu Kontseiluan aurkeztuko da, hilaren 29an, ostegunean, onar dadin, Ingurumen-Inpaktuaren Adierazpena (IIA) lortu baitu. Hala ere, behin-behineko dokumentua da, ostegunean onartu ondoren lizitaziora atera aurretik legezko izapideak gainditu beharko dituena. Hau da, bi hilabetez jendaurrean aurkeztea eta, alegaziorik balego, epe bera alegazioak ebazteko eta egin daitezkeen aldaketak ebazteko. Epe hori igarotakoan behin betiko proiektua aurkeztuko da, eta horrek lizitazioa eta ondorengo esleipena ekarriko ditu. Foru diputatuaren kalkuluen arabera lanak 2026. urtearen amaieran has litezke.
Jarduketa burutzeko 36 hilabeteko epea aurreikusten da eta 20.777.458,17 euroko (BEZ barne) lizitazio-aurrekontua du. Esku-hartze hau etorkizuneko mendebaldeko saihesbidearen lehen fasea da; saihesbide honen trazadura osoak BI-3302 eta BI-2301 errepideak lotuko ditu Mallumendi mendia zeharkatuz.
Mendebaldeko Saihesbidearen I. fasea Ermuko hirigunetik kanpoko bide-ardatz berria izango da eta BI-3302 errepidea eta BI-3344 errepidea lotuko ditu, Urtiako zubibidearen bidez. Horrela nabarmen murriztuko da Urtia industrialdetik datorren trafiko astuna, gaur egun Ermuko erdigunea zeharkatzen duena inguruko errepide nagusietara iristeko.
Trazadura BI-3302 errepide zaharrean kokatuta dagoen puntu horretatik abiatuko da eta Izarrako, izen bereko udal-eraikinetik gertu dagoen, biribilgune berrian amaituko da. Guztira hiru biribilgune nagusi izango ditu — Urtia, Izarra eta Zearreko —, eta hirigunera sartzeko bide bat, dauden espaloiekin lotzeko oinezkoentzako ibilbidea izango duena.
Proiektuak bi errei (noranzko bakoitzeko bat), metro bateko bazterbideak eta tarte bakoitzari egokitzeko diseinatutako abiadurak aurreikusten ditu: 60 km/h saihesbidean, 40 km/h biribilguneetan eta 20 km/h hiri-sarbidean.
Hiru egitura azpimarragarri
Carlos Alzagak, bere azalpen zehatzean zehar, saihesbidearen lehen fase honetan gaituko diren hiru pasabide-egiturak zerrendatu ditu:
– Urtiako zubibidea, 100 metroko luzera eta altzairu eta hormigoizko tipologia mistoa dituena, Urtia errekaren harana gaindituko duena
– Urtia errekaren (Zubitegi erreka) gaineko zubia, lehendik dagoen egitura bat ordezkatu eta ibai-ibilgua hobetuko duena
– Izarrako ibarbidearen gaineko zubia, 38 metrokoa, etorkizuneko II. faserako jarraitutasuna bideratuko duena
Gainera proiektuak eustormak eraikitzea eta Zubitegi erreka bideratzeko jarduketak jasotzen ditu, erriberako ekosistemak babesteko eta ibilguaren ahalmen hidraulikoa hobetzeko bioingeniaritzako teknikak erabiliz.
Jasangarritasuna eta ingurumena lehengoratzea
Bere hitzaldian Azpiegituretarako eta Lurralde Garapenerako foru diputatuak Bizkaiko Foru Aldundiak ingurumenarekin duen konpromisoa berretsi du, proiektuaren ardatz nagusia ingurumenaren gaineko inpaktua minimizatzea dela ziurtatuz. Zentzu horretan Alzagak esan du flora, fauna eta uraren kalitatea babesteko prebentzio- eta zuzenketa-neurriak aplikatuko direla, batez ere Zubitegi errekaren inguruan; toki horretan ez da lanik egingo martxoaren 15etik uztailaren 31ra, bisoi europarra babesteko eremua baita.
Horrekin batera paisaia lehengoratzeko proiektua gauzatuko da, bide berria bere ingurunean integratzeko helburuarekin espezie autoktonoak dituzten landaketak -harizti atlantikoa eta haltzadi kantauriarra- eta ezpondetan eta ibai-ertzetan landareztatze naturaleko sistemak barne hartuko dituena.
Azkenik, indusketetako material soberakinak gaur egun erabiltzen ez den Ermuko ordainlekuaren lotune zaharrean dagoen zabortegi kontrolatu batean utziko dira. Garraio-ibilbideak herritarrei ahalik eta eragozpen gutxien sortzeko moduan antolatuko dira eta lehentasuna emango zaio horretarako N-634, BI-3344 eta AP-8 bide nagusiak erabiltzeari.
