“Hezkuntzarako bizikletak/Senegal” lelopean Senegalgo landa eremuetan hezkuntzarako sarbidea laguntzeko izango da
DURANGO| Durangok elkartasunarekiko eta nazioarteko lankidetzarekiko duen konpromisoa indartu du, “Hezkuntzarako bizikletak/Senegal” kanpainan modu aktiboan parte hartuz. Ekimen honen helburua da bigarren eskuko bizikletak jasotzea, Senegalgo landa-eremuetako haurrentzat. Ekintza honen bidez, hezkuntza ingurune horietara baldintza berdintsuagoetan hurbiltzea bilatzen da, eta, horrela, Afrikako herrialde horretako komunitate askotan ematen den eskola-absentismo tasa handia murrizten laguntzea.
Kanpaina Mikel Porto eibartarrak bultzatu du, BAOBAB Taldearen Nazioarteko Elkartearekin elkarlanean, eta hainbat gizarte- eta udal-erakunderen babesa du. Testuinguru horretan, Durangoko Udalak laguntza eman du, hogei bat bizikleta eta ibilgailu motordun bat dohaintzan emanez, Stop Bide Indarkeria elkartearekin batera garatzen duen bide-hezkuntzako programatik abiatuta. Material hori Senegalen konponduko da, eta bertan bere piezak ere aprobetxatuko dira funtzionaltasuna bermatzeko.
Bizikleten azken helmuga Senegalgo landa-eremuak dira, non haur askok egunero 10 kilometro baino gehiago egin behar izaten duten eskolara joateko. Garraiobide egokia izateak nabarmen hobetuko ditu eskolara joateko aukerak eta haurren bizi-kalitatea. Ildo horretan, proiektuak hezkuntzarako eskubidea zailtzen duten egiturazko oztopoak ezabatzeko helburua du.
Kanpainak, gainera, Ayuda Contenedores erakundearen babes logistikoa du. Material solidarioaren bidalketan espezializatutako erakunde hau arduratuko da jasotako material guztia garraiatzeaz.
Aldi berean, betaurrekoak biltzeko kanpainak ere martxan jarraitzen du. 2025 urte hasieran sei kutxa jaso ziren, eta urtean zehar beste bi gehitu ziren. Batutako material optiko guztia otsailaren amaieran entregatzea aurreikusten da. Aurten ere kanpaina abian da eta herritarrak parte hartzera gonbidatzen dira.
Durangoko Udalak irmoki uste du elkartasunak ez duela mugarik. Horregatik, Udalak honelako ekimenak babeste jarraituko du aurrerantzean ere.
